કાલે મહિલા વર્લ્ડ કપનો ફાઇનલ, વરસાદ વિઘ્નરૂપ બને તો દ.આફ્રિકા વિજેતા બનશે

રિઝર્વ-ડેની જોગવાઇ, પોઇન્ટ ટેબલમાં ભારત પાછળ

મહિલા ODI વર્લ્ડ કપ 2025ની ફાઇનલ ભારત અને દક્ષિણ આફ્રિકા વચ્ચે રમાશે. 2 નવેમ્બરના રોજ, ભારત અને દક્ષિણ આફ્રિકા નવી મુંબઈના ડી.વાય. પાટિલ સ્ટેડિયમ ખાતે વિશ્વ ચેમ્પિયન બનવા માટે ટકરાશે. ભારતે સેમિફાઇનલમાં ઓસ્ટ્રેલિયા સામે પ્રભાવશાળી પ્રદર્શન કરીને ફાઇનલમાં સ્થાન મેળવ્યું હતું, જ્યારે દક્ષિણ આફ્રિકાએ સેમિફાઇનલમાં ઇંગ્લેન્ડને હરાવીને ફાઇનલમાં સ્થાન મેળવ્યું હતું.

જો વરસાદને કારણે મેચ રદ થાય છે, તો પ્રશ્ન એ છે કે કઈ ટીમને ચેમ્પિયન જાહેર કરવામાં આવશે? વર્લ્ડ કપ 2025માં ઘણી મેચ વરસાદને કારણે રદ કરવામાં આવી હતી. નવી મુંબઈમાં પણ ઘણી મેચ વરસાદથી પ્રભાવિત થઈ છે. તેથી, જો 2 નવેમ્બરના રોજ ભારત અને દક્ષિણ આફ્રિકા વચ્ચે વરસાદના કારણે રમતમાં વિક્ષેપ પડે છે, તો મેચ 3 નવેમ્બરના રોજ રમાશે. ફાઇનલ માટે 3 નવેમ્બરને રિઝર્વ ડે તરીકે નિયુક્ત કરવામાં આવ્યો છે. જો 3 નવેમ્બરના રોજ વરસાદને કારણે મેચ રદ થાય અને કોઈ પરિણામ ન આવે, તો પોઈન્ટ ટેબલમાં સૌથી વધુ પોઈન્ટ ધરાવતી ટીમને વિજેતા જાહેર કરવામાં આવશે. દક્ષિણ આફ્રિકાના 10 પોઈન્ટ છે, જ્યારે ભારતના 7 પોઈન્ટ છે. તેથી, દક્ષિણ આફ્રિકા વિશ્વ ચેમ્પિયન બનશે.

AccuWeatherના અહેવાલો અનુસાર 2 નવેમ્બરે નવી મુંબઈમાં તાપમાન 31 ડિગ્રી સેલ્સિયસ રહેશે, જેમાં વરસાદની 25 ટકા શક્યતા છે. 18 કિલોમીટર પ્રતિ કલાકની ઝડપે પવન ફૂંકાશે. 3 નવેમ્બરે પણ વરસાદની 25 ટકા શક્યતા છે, જેમાં તાપમાન 31 ડિગ્રી સેલ્સિયસ રહેશે. બંને દિવસે વરસાદની શક્યતા છે. આની મેચ પર અસર પડી શકે છે.

ભારતની સંભવિત પ્લેઈંગ 11: શેફાલી વર્મા, સ્મૃતિ મંધાના, અમનજોત કૌર, હરમનપ્રીત કૌર (કેપ્ટન), જેમિમા રોડ્રિગ્સ, દીપ્તિ શર્મા, રિચા ઘોષ (વિકેટકીપર), રાધા યાદવ, ક્રાંતિ ગૌડ, શ્રી ચરણી, રેણુકા સિંહ ઠાકુર.