ઉતાવળ શું છે? મેચ થવાદો: સુપ્રીમનો ભારત-પાક. ક્રિકેટ જંગ રોકવા ઇનકાર

અરજીની તાત્કાલિક સુનાવણી કરવા ના પાડી કહ્યું, અમે શું કરી શકીએ?

એશિયા કપ ટી-20 ટુર્નામેન્ટમાં 14 સપ્ટેમ્બરે ભારત અને પાકિસ્તાન વચ્ચે મેચ યોજાવાની છે. આ મેચ રદ કરવાની માંગ કરતી સુપ્રીમ કોર્ટમાં એક પીઆઈએલ દાખલ કરવામાં આવી હતી. અરજદારે સુપ્રીમ કોર્ટને આ અરજી તાત્કાલિક સૂચિબદ્ધ કરવા વિનંતી કરી હતી. પરંતુ કોર્ટે આમ કરવાનો ઇનકાર કર્યો હતો.
લાઈવ લોના અહેવાલ મુજબ, આ મામલો જસ્ટિસ જેકે મહેશ્વરી અને જસ્ટિસ વિજય બિશ્નોઈની બેન્ચ પાસે ગયો હતો.

અરજદારના વકીલે આ મામલો આવતીકાલે એટલે કે 12 સપ્ટેમ્બર માટે સૂચિબદ્ધ કરવાની વિનંતી કરી હતી. આના પર જસ્ટિસ મહેશ્વરીએ કહ્યું, આમાં ઉતાવળ શું છે? આ એક મેચ છે, તેને થવા દો.

વકીલે કોર્ટને જણાવ્યું હતું કે મેચ 14 સપ્ટેમ્બરે યોજાવાની છે, તેથી જો આ મામલો 12 સપ્ટેમ્બરે લિસ્ટેડ ન થાય, તો આ અરજીનો કોઈ અર્થ રહેશે નહીં. આના પર બેન્ચે કહ્યું, મેચ આ રવિવારે છે? આપણે આમાં શું કરી શકીએ? રહેવા દો. મેચ ચાલુ રહેવી જોઈએ.

આ પછી, વકીલે દલીલ કરી કે તેમનો કેસ સારો હોય કે ખરાબ, ઓછામાં ઓછું આ મામલો તો લિસ્ટેડ થઈ શકે છે. જોકે, જસ્ટિસ મહેશ્વરીએ આ વિનંતીને ફગાવી દીધી અને પુનરોચ્ચાર કર્યો કે મેચ ચાલુ રહેવી જોઈએ.