2027નો વર્લ્ડ કપ રમવા માગે છે વિરાટ કોહલી, દિનેશ કાર્તિકનો દાવો

લંડનમાં સખત પ્રેક્ટિસ કરતા હોવાનું પણ વીડિયોમાં જણાવ્યું

વિરાટ કોહલી અને કેપ્ટન રોહિત શર્મા ટૂંક સમયમાં ઓસ્ટ્રેલિયા સામેની ઓડીઆઇ શ્રેણી (IND vs AUS ODI Series) માં રમતા જોવા મળશે. જોકે, તેમની મેદાન પરની ભાગીદારી કરતાં પણ વધુ ચર્ચા તેમના ક્રિકેટ ભવિષ્યને લઈને થઈ રહી છે. વિવિધ અહેવાલો મુજબ, ઓસ્ટ્રેલિયાનો આ પ્રવાસ આ બંને દિગ્ગજોનો છેલ્લો આંતરરાષ્ટ્રીય પ્રવાસ હોઈ શકે છે. જોકે BCCIના ઉપપ્રમુખ રાજીવ શુક્લાએ આ અફવાઓને ફગાવી દીધી છે, પરંતુ 2027 ના ઓડીઆઇ વર્લ્ડ કપમાં તેમની ભાગીદારી હજુ પણ એક પ્રશ્ન છે. આ દરમિયાન, ભૂતપૂર્વ વિકેટકીપર-બેટ્સમેન અને હાલમાં આરસીબીના બેટિંગ કોચ તથા માર્ગદર્શક દિનેશ કાર્તિકે વિરાટ કોહલીના ભવિષ્ય વિશે એક મહત્ત્વપૂર્ણ નિવેદન આપ્યું છે.

દિનેશ કાર્તિક, જે વિરાટ કોહલીના સારા મિત્ર પણ છે, તેમણે ઇન્સ્ટાગ્રામ પર એક વિડીયો ક્લિપ શેર કરતા કહ્યું કે વિરાટ 2027 વર્લ્ડ કપમાં રમવા માટે ઉત્સાહિત છે. કાર્તિકે ભારપૂર્વક જણાવ્યું કે, તે 2027 વર્લ્ડ કપમાં રમવા માટે ઉત્સાહિત છે અને લંડનમાં પ્રેક્ટિસ કરી રહ્યો છે. તે અઠવાડિયામાં 2 થી 3 વખત પ્રેક્ટિસ કરી રહ્યો છે. આ સ્પષ્ટપણે બતાવે છે કે તે વર્લ્ડ કપમાં રમવા માટે ખૂબ જ ગંભીર છે. દિનેશ કાર્તિકે આ જ વિડીયોમાં વધુમાં કહ્યું કે વિરાટ કોહલીના વર્તમાન ઓડીઆઇ ફોર્મને જોતાં, તેને 2027 વર્લ્ડ કપની યોજનાઓમાં ચોક્કસપણે સામેલ કરવો જોઈએ. આ નિર્ણય વિરાટના તાજેતરના પ્રદર્શન પર આધારિત છે. ઉદાહરણ તરીકે, ચેમ્પિયન્સ ટ્રોફી 2025 માં, વિરાટ કોહલીએ 54.5 ની મજબૂત સરેરાશથી 218 રન બનાવ્યા હતા.