તિલક વર્મા-સેમસનની તોફાની બેટિંગ, ભારતે આફ્રિકાને 135 રને કચડ્યું

દક્ષિણ આફ્રિકા સામેની છેલ્લી ટી-20 મેચમાં ભારતે શાનદાર જીત મેળવી છે. આ મેચમાં આફ્રિકાને 135 રનથી રગદોળ્યું હતું. ભારતીય ટીમ વાવાઝોડાની જેમ આફ્રિકા પર તુટી પડી હતી. ભારતીય ટીમે પ્રથમ બેટિંગ કરતા 20 ઓવરમાં માત્ર એક વિકેટ ગુમાવીને 283 રન બનાવ્યા હતા. જેના જવાબમાં આફ્રિકાની ટીમ 18.2 ઓવરમાં 148 રનમાં ઓલઆઉટ થઈ ગઈ હતી. ભારત અને દક્ષિણ આફ્રિકા વચ્ચે 4 મેચની ટી20 શ્રેણીની છેલ્લી મેચ જોહાનિસબર્ગના વાન્ડરર્સ સ્ટેડિયમમાં રમાઈ હતી.

આ મેચમાં ભારતીય બેટ્સમેનોની વિસ્ફોટક બેટિંગ જોવા મળી હતી. છેલ્લી મેચના હીરો તિલક વર્માએ પોતાનું શાનદાર ફોર્મ જારી રાખ્યું અને આ મેચમાં પણ સદી ફટકારી. તિલક વર્માની ટી20 કારકિર્દીની આ બીજી સદી છે. છેલ્લી મેચમાં તેણે 51 બોલમાં પોતાની સદી પૂરી કરી હતી. પરંતુ આ વખતે તેણે તેનાથી પણ ઓછા બોલ લીધા.
આફ્રિકાની ટીમ 18.2 ઓવરમાં 148 રનમાં ઓલઆઉટ થઈ ગઈ હતી. આફ્રિકા તરફથી સ્ટબ્સે સૌથી વધુ 43 રન બનાવ્યા હતા. જ્યારે ભારતીય ટીમ માટે અર્શદીપ સિંહે સૌથી વધુ 3 વિકેટ લીધી હતી. વરુણ ચક્રવર્તી અને અક્ષર પટેલને 2-2 સફળતા મળી. હાર્દિક પંડ્યા, રમનદીપ સિંહ અને રવિ બિશ્નોઈએ 1-1 વિકેટ લીધી હતી.

તિલક વર્માએ જોહાનિસબર્ગમાં માત્ર 41 બોલમાં સદી ફટકારવાની સિદ્ધિ મેળવી હતી. તેણે મેચમાં કુલ 47 બોલનો સામનો કર્યો અને 120 અણનમ રન બનાવ્યા. તેની ઇનિંગમાં 9 ચોગ્ગા અને 10 છગ્ગાનો સમાવેશ થાય છે. આ સમયગાળા દરમિયાન તેણે 255.31ના સ્ટ્રાઈક રેટથી રન બનાવ્યા. આ ઈનિંગમાં પણ કેપ્ટન સૂર્યકુમાર યાદવની જગ્યાએ તિલક વર્મા બેટિંગ કરવા આવ્યો હતો. સૂર્યકુમાર યાદવ ટી20માં ત્રીજા નંબર પર રમે છે, પરંતુ છેલ્લી બે મેચમાં તિલક વર્મા આ નંબર પર રમી રહ્યો છે અને તે બંને વખત સદી ફટકારવામાં સફળ રહ્યો છે.
તિલક વર્માએ આ ઇનિંગ સાથે એક મોટો રેકોર્ડ પણ પોતાના નામે કરી લીધો છે. તે સતત બે ટી20 મેચમાં સદી ફટકારનાર ભારતનો બીજો બેટ્સમેન બની ગયો છે. આ પહેલા સંજુ સેમસને આ સિદ્ધિ મેળવી હતી. આ સાથે જ તે આ રેકોર્ડ બનાવનાર વિશ્વનો 5મો બેટ્સમેન બની ગયો છે. આ પહેલા ફિલ સોલ્ટ, ગુસ્તાવ મેકોન અને રિલે રૂૂસો પણ ટી-20માં સતત બે સદી ફટકારી ચૂક્યા છે.

આ ઇનિંગમાં તિલક વર્મા ઉપરાંત સંજુ સેમસને પણ સદી ફટકારી હતી. આ બંને ખેલાડીઓની જોરદાર બેટિંગના કારણે ભારતીય ટીમે 20 ઓવરમાં 1 વિકેટના નુકસાન પર 283 રન બનાવ્યા હતા. આ ટી20 ક્રિકેટમાં ભારતનો બીજો સૌથી મોટો સ્કોર છે. આ મેચમાં સંજુ સેમસને 56 બોલમાં 109 રનની અણનમ ઇનિંગ રમી હતી. આ સાથે જ અભિષેક શર્માએ પણ 18 બોલમાં 36 રનનું યોગદાન આપ્યું હતું. આ સિવાય દક્ષિણ આફ્રિકા તરફથી લુથો સિપામલાએ એકમાત્ર વિકેટ લીધી હતી.

સંજુ-તિલક વર્માએ બનાવ્યો ઐતિહાસિક રેકોર્ડ
મેચમાં ભારતીય ટીમે શરૂૂઆતથી જ આક્રમક વલણ અપનાવ્યું હતું. સંજુ સેમસન અને અભિષેક શર્મા (36)એ ઓપનિંગમાં 73 રનની ભાગીદારી કરી હતી. આ પછી સંજુએ તિલક વર્મા સાથે મળીને રેકોર્ડ 93 બોલમાં 210 રનની અણનમ ભાગીદારી કરી હતી. સંજુ સેમસને 51 બોલમાં સદી અને તિલક વર્માએ 41 બોલમાં સદી ફટકારી હતી. સંજુ સેમસને 56 બોલમાં 109 રનની શાનદાર ઇનિંગ રમી હતી. જ્યારે તિલકે 47 બોલમાં 120 રન બનાવ્યા હતા. ટી20 ઈન્ટરનેશનલ કરિયરમાં સંજુની આ ત્રીજી સદી હતી, જે તેણે છેલ્લી 5 મેચમાં ફટકારી છે. બીજી તરફ તિલક વર્માની આ બીજી સદી હતી. તેણે આ શ્રેણીમાં સતત આ બંને સદી પણ ફટકારી છે. જ્યારે આફ્રિકન ટીમ માટે લુથો સિપામલાએ એકમાત્ર વિકેટ લીધી હતી. ટી20 ઈતિહાસમાં પ્રથમ વખત આઇસીસી ફુલ નેશન મેમ્બર ટીમો વચ્ચે એક ટીમના બે બેટ્સમેનોએ એકસાથે સદી ફટકારી છે. આ ઈતિહાસ છે. આ ફોર્મેટમાં આ ત્રીજી વખત બન્યું છે. ભારતીય ટીમે આ મેચમાં 1 વિકેટે 283 રન બનાવ્યા હતા. સાઉથ આફ્રિકા સામે ટી20માં આ સૌથી મોટો સ્કોર છે. અગાઉ 2 ઓક્ટોબર 2022ના રોજ 3 વિકેટે 237 રન બનાવ્યા હતા.

દક્ષિણ આફ્રિકા સામે ભારતનો શાનદાર રેકોર્ડ
ભારતે દક્ષિણ આફ્રિકા સામે છેલ્લી 6 દ્વિપક્ષીય ટી20 શ્રેણીમાંથી 3 જીતી છે. જ્યારે 3 ટી20 શ્રેણી ડ્રોમાં સમાપ્ત થઈ છે. ભારત અને દક્ષિણ આફ્રિકા વચ્ચે અત્યાર સુધીમાં 9 દ્વિપક્ષીય ટી20 શ્રેણી રમાઈ છે. આ સમયગાળા દરમિયાન ભારતે 4 અને આફ્રિકાએ 2 જીત મેળવી છે. 3 શ્રેણી ડ્રો રહી છે. ભારતીય ટીમને છેલ્લે ઓક્ટોબર 2015માં દક્ષિણ આફ્રિકા સામે દ્વિપક્ષીય ટી20 શ્રેણીમાં હારનો સામનો કરવો પડ્યો હતો. ત્યારથી ટીમ હાર્યું નથી. હવે ભારત અને દક્ષિણ આફ્રિકા વચ્ચે 10મી દ્વિપક્ષીય ટી20 શ્રેણી રમાઈ રહી છે.