દ. આફ્રિકાના ટેમ્બા બાવુમાએ જીત સાથે 100 વર્ષ જૂનો રેકોર્ડ તોડ્યો

દક્ષિણ આફ્રિકાએ ICC ટેસ્ટ ચેમ્પિયનશિપ જીતીને, ટેમ્બા બાવુમાએ ઇતિહાસના પાનામાં પોતાનું નામ લખાવી લીધું છે. કોઈને અપેક્ષા નહોતી કે દક્ષિણ આફ્રિકા ઓસ્ટ્રેલિયા જેવી ટીમ સામે ટકી શકશે, પરંતુ બાવુમાએ પોતાની કેપ્ટનશીપ અને બેટિંગથી ટીમનું નેતૃત્વ કર્યું અને ઐતિહાસિક જીત અપાવી. આ જીત સાથે, બાવુમાએ 100 વર્ષ જૂનો રેકોર્ડ પોતાના નામે કરી લીધો છે.

ટેસ્ટ ચેમ્પિયનશિપ જીતીને, દક્ષિણ આફ્રિકાએ 27 વર્ષના ICC ટ્રોફીના દુષ્કાળનો અંત લાવ્યો. આ પહેલા દક્ષિણ આફ્રિકાએ 1998માં ICC નોકઆઉટ ટ્રોફી જીતી હતી. આ જીત સાથે, બાવુમાએ દક્ષિણ આફ્રિકાના કપાળ પરથી ચોકર્સનું ટેગ દૂર કર્યું.

ડીન એલ્ગર પછી બાવુમાએ દક્ષિણ આફ્રિકાની કેપ્ટનશીપ સંભાળી અને પોતાની ટીમને હાર્યા વિના ટેસ્ટ ચેમ્પિયનશીપની ફાઇનલમાં પહોંચાડી. તેમણે ટેસ્ટ કેપ્ટન તરીકેની પોતાની પહેલી 10 મેચમાંથી નવ મેચ જીતી અને એક મેચ ડ્રો રહી. બાવુમા પોતાની પહેલી 10 મેચમાં સૌથી સફળ ટેસ્ટ કેપ્ટન બન્યા છે. બાવુમાએ 100 વર્ષ જૂનો રેકોર્ડ તોડી નાખ્યો છે. તેમણે ઇંગ્લેન્ડના ર્સી ચેપમેનને પાછળ છોડી દીધો છે જેમણે 1926માં પોતાની પહેલી 10 મેચમાંથી નવ મેચ જીતી હતી, પરંતુ એક હારી ગઈ હતી.રિકી પોન્ટિંગ, જેને વિશ્વના સૌથી સફળ કેપ્ટનોમાંના એક ગણવામાં આવે છે, તે પણ આ બાબતમાં બાવુમાથી પાછળ રહી ગયો. પોન્ટિંગે તેની પહેલી 10 મેચમાંથી આઠ મેચ જીતી હતી. આ ઉપરાંત, તે એક મેચ હારી ગયો અને એક મેચ ડ્રો રહી. બાવુમાનો આ વિજય આંકડાઓ કરતાં ઘણો વધારે છે. તેણે જે રીતે કેપ્ટનશીપ કરી અને ટીમ માટે ICC ટાઇટલ જીત્યું તેણે તેને તેના દેશના મહાન કેપ્ટનોમાં સ્થાન આપ્યું છે.