મહિલા પ્રીમિયર લીગમાં વર્લ્ડ કપમાં પ્લેયર ઓફ ધ સિરીઝ દિપ્તી શર્મા રિટેન ન થઇ!!

યુપી વોરિયર્સે શ્ર્વેતા સેહરાવત સિવાયની તમામ ખેલાડીઓને રિલીઝ કરી

મહિલા પ્રીમિયર લીગ ઓક્શન પહેલા પાંચેય ફ્રેન્ચાઈઝી દ્વારા રિટેન કરાયેલા ખેલાડીઓની યાદી જાહેર કરવામાં આવી છે. આ વખતે, બધી ટીમોને વધુમાં વધુ પાંચ ખેલાડીઓને રિટેન કરવાની મંજુરી હતી. બાકીના બધા ખેલાડીઓને હરાજી માટે મૂકવામાં આવશે. હરાજીમાં રાઈટ ટુ મેચ કાર્ડનો પણ ઉપયોગ કરવામાં આવશે. સૌથી આશ્ચર્યજનક રિટેન્શનનો નિર્ણય યુપી વોરિયર્સ દ્વારા લેવામાં આવ્યો છે, જેમણે ફક્ત એક જ ખેલાડીને જાળવી રાખી છે અને તેમની ટીમના બાકીના ખેલાડીઓને રિલીઝ કર્યા છે.

એક અહેવાલ મુજબ, ઉત્તર પ્રદેશ વોરિયર્સે ફક્ત શ્વેતા સેહરાવતને જાળવી રાખવાનો નિર્ણય લીધો છે. આનો અર્થ એ થયો કે 2025 વર્લ્ડ કપમાં પ્લેયર ઓફ ધ સિરીઝ દીપ્તિ શર્માને રિલીઝ કરવામાં આવી છે. આ દરમિયાન, ઓસ્ટ્રેલિયાની અનુભવી ખેલાડી એલિસા હીલીને પણ રિટેન કરવામાં આવી નથી. તેથી, આ સ્ટાર ખેલાડીઓ હરાજી માટે ઉપલબ્ધ રહેશે. ઓસ્ટ્રેલિયાની મેગ લેનિંગ અને ન્યુઝીલેન્ડની ઓલરાઉન્ડર અમેલિયા કેર જેવા સ્ટાર ખેલાડીઓને પણ તેમની ટીમોએ રિલીઝ કર્યા છે.

બીજી તરફ, ભારતીય સ્ટાર્સ હરમનપ્રીત કૌર, સ્મૃતિ મંધાના, જેમીમા રોડ્રિગ્સ અને શેફાલી વર્માને તેમની ટીમોએ જાળવી રાખ્યા છે. દિલ્હી કેપિટલ્સ અને મુંબઈ ઈન્ડિયન્સે સૌથી વધુ ખેલાડીઓ રિટેન કર્યા છે, જેમાં દરેકમાં પાંચ-પાંચ રિટેન ખેલાડીઓ છે. ડિફેન્ડિંગ ચેમ્પિયન રોયલ ચેલેન્જર્સ બેંગ્લોરે ચાર ખેલાડીઓ જાળવી રાખ્યા છે. ગુજરાત જાયન્ટ્સે ફક્ત બે ખેલાડીઓ જાળવી રાખ્યા છે, અને યુપી વોરિયર્સે ફક્ત એક ખેલાડી રિટેન કર્યા છે.

દિલ્હીમાં થનારા ઓક્શન માટે દરેક ફ્રેન્ચાઈઝીને ₹15 કરોડનું ભંડોળ ફાળવવામાં આવ્યું છે. કોઈપણ ફ્રેન્ચાઈઝ જે પાંચ ખેલાડીઓને જાળવી રાખશે તેના ₹15 કરોડના ભંડોળમાંથી ₹9.25 કરોડ કાપવામાં આવશે. ચાર ખેલાડીઓ માટે ₹8.75 કરોડ, ત્રણ ખેલાડીઓ માટે ₹7.75 કરોડ, બે ખેલાડીઓ માટે ₹6 કરોડ અને એક માટે ₹3.5 કરોડ કપાત કરવામાં આવશે. રિટેન કરાયેલા પહેલા ખેલાડીને ₹3.5 કરોડ, બીજા ખેલાડીને ₹2.5 કરોડ, ત્રીજા ખેલાડીને ₹1.75 કરોડ, ચોથા ખેલાડીને ₹1 કરોડ અને પાંચમા ખેલાડીને ₹50 લાખ મળશે.

રિટેન કરાયેલા ખેલાડીઓની યાદી
દિલ્હી કેપિટલ્સ: એનાબેલ સધરલેન્ડ, મેરિઝાન કેપ, જેમિમાહ રોડ્રિગ્સ, શેફાલી વર્મા, નિકી પ્રસાદ.
મુંબઈ ઈન્ડિયન્સ: હરમનપ્રીત કૌર, નેટ સાયવર-બ્રન્ટ, અમનજોત કૌર, જી કામિલિની, હેલી મેથ્યુસ.
રોયલ ચેલેન્જર્સ બેંગ્લોર: સ્મૃતિ મંધાના, એલિસ પેરી, રિચા ઘોષ, શ્રેયંકા પાટિલ.
ગુજરાત જાયન્ટ્સ: એશ્ર્લે ગાર્ડનર, બેથ મૂની.
યુપી વોરિયર્સ: શ્વેતા સેહરાવત