તિલકની મિસાઈલમાં પાકિસ્તાનનું પ્લેન ક્રેશ

એશિયન ક્રિકેટમાં ભારત શહેનશાહ, નવમી વખત ચેમ્પિયન ટ્રોફી જીતી

એશિયા કપ 2025 ની બહુપ્રતિક્ષિત ફાઇનલ મેચમાં ટીમ ઇન્ડિયાએ કટ્ટર હરીફ પાકિસ્તાનને 5 વિકેટથી હરાવીને ચેમ્પિયનનું ટાઇટલ જીતી લીધું છે. દુબઈ ખાતે રમાયેલી આ રોમાંચક મેચમાં ભારતીય કેપ્ટન સૂર્યકુમાર યાદવે ટોસ જીતીને પહેલા બોલિંગ કરવાનો નિર્ણય લીધો હતો. પહેલા બેટિંગ કરતા પાકિસ્તાને સાહિબજાદા ફરહાન (57 રન) અને ફખર ઝમાન (47 રન) ની મજબૂત શરૂૂઆત છતાં માત્ર 19.1 ઓવરમાં 146 રનમાં જ ઓલઆઉટ થઈ ગયું હતું.

ભારતીય બોલરોમાં કુલદીપ યાદવે 4 વિકેટ ઝડપીને પાકિસ્તાનના ધબડકાનું મુખ્ય કારણ બન્યો હતો. 147 રનના લક્ષ્યાંકનો પીછો કરતા, ભારતના ટોચના ક્રમની નિષ્ફળતા છતાં, યુવા બેટ્સમેન તિલક વર્મા (અડધી સદી) અને શિવમ દુબે (33 રન) વચ્ચેની 60 રનની મહત્ત્વપૂર્ણ ભાગીદારીને કારણે ટીમ ઇન્ડિયાએ છેલ્લી ઓવરમાં લક્ષ્ય હાંસલ કર્યું અને ટાઇટલ જીત્યું.

પાકિસ્તાની બેટ્સમેનોએ ફાઇનલમાં શાનદાર શરૂૂઆત કરી હતી, પરંતુ મધ્યક્રમની સંપૂર્ણ નિષ્ફળતાને કારણે તેઓ મોટો સ્કોર કરવામાં નિષ્ફળ રહ્યા. ઓપનિંગ બેટ્સમેન સાહિબજાદા ફરહાન (57 રન, 38 બોલ) અને ફખર ઝમાન (47 રન, 35 બોલ) એ 9.4 ઓવરમાં પ્રથમ વિકેટ માટે 84 રનની મજબૂત ભાગીદારી કરી હતી.

જોકે, 113/2 ના મજબૂત સ્કોર પર પહોંચ્યા પછી પાકિસ્તાનનો દાવ સંપૂર્ણપણે પડી ભાંગ્યો. પાકિસ્તાની ટીમ આગામી 8 વિકેટ માત્ર 33 રનમાં ગુમાવીને 19.1 ઓવરમાં 146 રનમાં ઓલઆઉટ થઈ ગઈ. આઠ પાકિસ્તાની બેટ્સમેન સિંગલ-ડિજિટ સ્કોર પર આઉટ થયા હતા. ભારતની બોલિંગની વાત કરીએ તો, કુલદીપ યાદવે 4 વિકેટ ઝડપીને પાકિસ્તાનના બેટિંગ ઓર્ડરને તોડી નાખ્યો. જસપ્રીત બુમરાહ, વરુણ ચક્રવર્તી અને અક્ષર પટેલે બે-બે વિકેટ લઈને કુલદીપને સારો સાથ આપ્યો.

147 રનના લક્ષ્યનો પીછો કરતા ભારતની શરૂૂઆત ખૂબ જ નબળી રહી હતી, જેમાં ટોચના ક્રમના બેટ્સમેનો નિષ્ફળ રહ્યા હતા. આખી ટુર્નામેન્ટમાં શાનદાર ફોર્મમાં રહેલો ઓપનર અભિષેક શર્મા માત્ર 5 રન બનાવીને આઉટ થયો. ઉપ-કેપ્ટન શુભમન ગિલએ 10 બોલમાં 12 રન બનાવ્યા, જ્યારે કેપ્ટન સૂર્યકુમાર યાદવ પણ 5 બોલમાં માત્ર 1 રન બનાવીને ફ્લોપ રહ્યો. ભારતે 77 રનના સ્કોર પર ચોથી વિકેટ ગુમાવી હતી, જ્યારે સંજુ સેમસને 21 બોલમાં 24 રન બનાવીને ઇનિંગ્સને થોડી સંભાળી હતી.

આ મુશ્કેલ પરિસ્થિતિમાં તિલક વર્મા અને શિવમ દુબેએ ઇનિંગની કમાન સંભાળી. બંને યુવા બેટ્સમેનોએ પાંચમી વિકેટ માટે 60 રનની અત્યંત મહત્ત્વપૂર્ણ ભાગીદારી કરીને ભારતને જીતની નજીક પહોંચાડ્યું. તિલક વર્માએ અડધી સદી ફટકારીને ટીમને મજબૂત સ્થિતિમાં મૂકી. શિવમ દુબે 19મી ઓવરના છેલ્લા બોલ પર 22 બોલમાં 33 રન બનાવીને આઉટ થયો. અંતે, ભારતીય ટીમે લક્ષ્ય હાંસલ કરીને 5 વિકેટથી વિજય મેળવ્યો અને એશિયા કપ 2025 નું ટાઇટલ પોતાના નામે કર્યું.

ઓપરેશન સિંદૂર: રમતનું મેદાન, પણ પરિણામ એ જ: મોદી
ભારતનું જીતવાનું નક્કી જ: અમીત શાહ
ભારતીય ક્રિકેટ ટીમે એશિયા કપ 2025ની ફાઇનલમાં પાકિસ્તાનને પાંચ વિકેટથી હરાવ્યું. આ જીત પહેલગામ હુમલાના પીડિતોને રાહત આપશે અને ઓપરેશન સિંદૂરના કાર્યને આગળ વધારશે. ભારતના વડાપ્રધાન નરેન્દ્ર મોદીએ ટીમ ઇન્ડિયાને આ પ્રભાવશાળી વિજય બદલ અભિનંદન પાઠવ્યા હતા. પોતાના એક્સ હેન્ડલ પર પોસ્ટ કરતા નરેન્દ્ર મોદીએ લખ્યું- ઓપરેશન સિંદૂર મેદાનમાં ચાલુ છે. પરિણામ એ જ છે: ભારતની જીત. આપણા ક્રિકેટરોને અભિનંદન. કેન્દ્રીય ગૃહમંત્રી અમિત શાહે ભારતીય ટીમને તેમના વિજય બદલ અભિનંદન પાઠવ્યા. તેમણે કહ્યું, - આ એક શાનદાર જીત છે. આપણા ખેલાડીઓની જબરદસ્ત ઉર્જાએ ફરી એકવાર તેમના વિરોધીઓને કચડી નાખ્યા છે. ભારત જીતવાનું નક્કી છે ભલે ગમે તે સ્થળ હોય.