નામિબિયા ચોથી વખત ટી-20 વર્લ્ડ કપ માટે ક્વોલિફાય થયો

આઇસીસી મેન્સ ટી-20 વર્લ્ડ કપ આફ્રિકા રિજનલ ફાઈનલમાં નામિબિયાનું જોરદાર પ્રદર્શન ચાલુ રહ્યું હતું. ટીમે ફાઈનલમાં તાંઝાનિયાને હરાવીને 2026 ટી-20 વર્લ્ડ કપ માટે ક્વોલિફાય કર્યું હતું. ટી-20 વર્લ્ડ કપ 2026 ભારતમાં યોજાશે અને નામિબિયા ક્વોલિફાય થનારી 16મી ટીમ છે. નામિબિયા પહેલા ઈટાલીએ પણ ઝ20 વર્લ્ડ કપ માટે ક્વોલિફાય કર્યું છે. નામિબિયા ચોથી વખત ટી-20 વર્લ્ડ કપમાં ભાગ લેશે.

નામિબિયાની વસ્તી ભલે ફક્ત 30 લાખ હોય, પરંતુ તેમાં પ્રતિભાશાળી ખેલાડીઓની કોઈ કમી નથી. આવો જ એક પ્રતિભાશાળી ખેલાડી ઓલરાઉન્ડર જેજે સ્મિત છે, જેણે સેમિફાઈનલમાં તાંઝાનિયા સામે શાનદાર પ્રદર્શન કર્યું હતું. જેજે સ્મિતે પહેલા બેટથી શાનદાર પ્રદર્શન કર્યું અને પછી બોલથી પણ પોતાનું કૌશલ્ય દર્શાવ્યું.

જેજે સ્મિતે 43 બોલમાં અણનમ 61 રન બનાવ્યા, જેના કારણે નામિબિયાએ 20 ઓવરમાં 174 રન બનાવ્યા. જવાબમાં તાંઝાનિયા ફક્ત 111 રન જ બનાવી શક્યું. જેજે સ્મિતે બોલિંગમાં પણ કમાલ કર્યો, તેણે 4 ઓવરમાં 16 રન આપીને 3 વિકેટ લીધી. જેજે સ્મિત સિવાય શિકોંગોએ પણ 3 વિકેટ લીધી હતી.

આ ટુર્નામેન્ટમાં નામિબિયા માટે ફ્રાયલિંકે સૌથી વધુ રન બનાવ્યા છે. તેણે ચાર ઈનિંગ્સમાં 63 ની સરેરાશથી 189 રન બનાવ્યા છે. જેજે સ્મિતે પણ 174 ની સરેરાશથી 174 રન બનાવ્યા છે. જેજે સ્મિતનો સ્ટ્રાઈક રેટ 204.7 છે. જેજે સ્મિત અને ફ્રાયલિંક બંનેએ આ ટુર્નામેન્ટમાં એક-એક સદી ફટકારી છે. બોલિંગમાં, ઈટન સૌથી વધુ 10 વિકેટો લઈ ચૂક્યો છે. તેણે એક મેચમાં સતત ચાર વિકેટ લેવાની સિદ્ધિ પણ હાંસલ કરી છે.