શું ટીમ ઇન્ડિયા ભારતનું પ્રતિનિધિત્વ નથી કરતી? દિલ્હી હાઇકોર્ટનો સવાલ

ભારતીય ટીમનું નામ બદલવાની માગણી કરનાર વકીલને કોર્ટે ઝાટક્યા

દિલ્હી હાઈકોર્ટે ગઇકાલે ભારતીય ક્રિકેટ ટીમનું નામ બદલવાની માંગ કરતી અરજી ફગાવી દીધી હતી. અરજદારે ભારતીય ક્રિકેટ કંટ્રોલ બોર્ડ (BCCI)ને રાષ્ટ્રીય ક્રિકેટ ટીમ માટે ‘ભારતીય ક્રિકેટ ટીમ’ નામનો ઉપયોગ કરવાથી રોકવાની માંગ કરી હતી. મુખ્ય ન્યાયાધીશ દેવેન્દ્ર કુમાર ઉપાધ્યાય અને ન્યાયાધીશ તુષાર રાવ ગેડેલાએ પીઆઈએલ દાખલ કરવા બદલ વકીલ રિપક કંસલને સખત ઠપકો પણ આપ્યો.

બાર એન્ડ બેન્ચના અહેવાલ મુજબ, ન્યાયાધીશ ગેડેલાએ કહ્યું, શું તમે કહી રહ્યા છો કે ટીમ ભારતનું પ્રતિનિધિત્વ કરતી નથી? આ ટીમ દરેક જગ્યાએ ભારતનું પ્રતિનિધિત્વ કરે છે, પરંતુ તમે કહી રહ્યા છો કે તે ભારતનું પ્રતિનિધિત્વ કરતી નથી? આ ટીમ ઈન્ડિયા નથી ? જો આ ટીમ ઈન્ડિયા નથી, તો કૃપા કરીને અમને જણાવો કે આ ટીમ ઈન્ડિયા કેમ નથી?

મુખ્ય ન્યાયાધીશ ઉપાધ્યાયે કહ્યું કે પીઆઈએલ સમયનો સંપૂર્ણ બગાડ છે. આ કોર્ટના સમયનો સંપૂર્ણ બગાડ છે. અમને કોઈ એવી રાષ્ટ્રીય ટીમ બતાવો જે સરકારી અધિકારીઓ દ્વારા પસંદ કરવામાં આવતી હોય, કોર્ટે કહ્યું કોમનવેલ્થ ગેમ્સ અને ઓલિમ્પિકમાં ભાગ લેતી ભારતીય ટીમ... શું તે સરકારી અધિકારીઓ દ્વારા પસંદ કરવામાં આવે છે? શું તેઓ ભારતનું પ્રતિનિધિત્વ કરતા નથી? હોકી, ફૂટબોલ, ટેનિસ, કોઈ પણ રમત? કોર્ટે કહ્યું કે ભારતીય ટીમ દ્વારા ભારતીય ધ્વજનો ઉપયોગ કરવો એ કાયદાનું ઉલ્લંઘન નથી. હાઈકોર્ટે પૂછ્યું, જો તમે ઘરે ભારતીય ધ્વજ ફરકાવવા માંગતા હો, તો શું તમને આમ કરવાથી અટકાવવામાં આવે છે?

કોર્ટે એ પણ નોંધ્યું કે આંતરરાષ્ટ્રીય સંસ્થાઓએ રમતગમતમાં સરકારી દખલનો સતત વિરોધ કર્યો છે. કોર્ટે પૂછ્યું, શું તમે જાણો છો કે સમગ્ર રમતગમત ઇકોસિસ્ટમ કેવી રીતે કાર્ય કરે છે? શું તમે આઇઓસીના નિયમોથી વાકેફ છો? શું તમે ઓલિમ્પિક ચાર્ટરથી વાકેફ છો? શું તમે જાણો છો કે જ્યારે પણ રમતગમતમાં સરકારી દખલગીરી થઈ છે, ત્યારે IOCએ તેનો સખત વિરોધ કર્યો છે? બાદમાં કોર્ટે અરજી ફગાવી દીધી.