એશિયા કપના પ્રથમ મેચમાં અફઘાનિસ્તાનનો આસાન વિજય

189 રનના લક્ષ્યાંક સામે હોંગકોંગની ટીમ 94 રનમાં સમેટાઇ

અફઘાનિસ્તાને અહીં એશિયા કપની પ્રારંભિક મેચમાં હોંગ કોંગને 94 રનથી હરાવીને વિજયી આરંભ કર્યો હતો. હોંગ કોંગની ટીમ 189 રનના લક્ષ્યાંક સામે 9 વિકેટે માત્ર 94 રનના સ્કોર કરી શકી હતી.

અફઘાનિસ્તાને બેટિંગ પસંદ કર્યા પછી નબળી શરૂૂઆત બાદ ફટકાબાજી કરીને છ વિકેટે 188 રન કર્યા હતા. અફઘાનિસ્તાને 26 રનમાં બે વિકેટ ગુમાવી દીધી હતી, પરંતુ ઓપનર સેદિકુલ્લા અટલે (અણનમ 73 રન, બાવન બોલ, ત્રણ સિક્સર, છ ફોર) છેક સુધી ક્રીઝમાં રહીને ટીમની આબરૂૂ સાચવી લીધી હતી. અઝમતુલ્લા ઓમરઝાઇએ પણ (53 રન, 21 બોલ, પાંચ સિક્સર, બે ફોર) ટીમને મહત્ત્વનું યોગદાન આપ્યું હતું.

અટલ અને ઓમરઝાઈ વચ્ચે પાંચમી વિકેટ માટે 35 બોલમાં 82 રનની ભાગીદારી થઈ હતી. અફઘાનિસ્તાનની છમાંથી બે વિકેટ મૂળ મુંબઈના ગુજરાતી ઑફ-સ્પિનર કિંચીત દેવાંગ શાહે (3-0-24-2) લીધી હતી. તેણે મોહમ્મદ નબી તથા ગુલબદીન નઇબને આઉટ કર્યા હતા. ઉપરાંત તેણે અફઘાનિસ્તાનના આક્રમક બેટ્સમેનોને એક તબક્કે કાબૂમાં પણ રાખ્યા હતા. 29 વર્ષનો કિંચીત શાહ મૂળ તો બેટિંગ-ઑલરાઉન્ડર છે. તે માત્ર છ રન કરીને નૂર અહમદના બોલમાં કેચઆઉટ થયો હતો. અફઘાનની બીજી બે વિકેટ ભારતીય મૂળના પેસ બોલર આયુષ શુક્લાએ મેળવી હતી અને એક-એક વિકેટ અતીક ઇકબાલ અને એહસાન ખાને લીધી હતી