ટેસ્ટ ક્રિકેટના 150 વર્ષ પૂર્ણ, મેલબોર્નમાં યોજાશે ડે-નાઈટ ટેસ્ટ

ઓસ્ટ્રેલિયા-ઈંગ્લેન્ડ પિંક બોલ ટેસ્ટમાં ટકરાશે

ક્રિકેટનું સૌથી જૂનું ફોર્મેટ એટલે કે ટેસ્ટ ક્રિકેટ 150 વર્ષ પૂર્ણ કરવા જઈ રહ્યું છે. ટેસ્ટ ક્રિકેટ 2027 માં તેના 150 વર્ષ પૂર્ણ કરશે. આ ખાસ પ્રસંગે મેલબોર્ન ક્રિકેટ ગ્રાઉન્ડ (MCG) ખાતે એક ટેસ્ટ મેચ રમાશે. આ મેચ ડે-નાઈટ ટેસ્ટ હશે, જેમાં યજમાન ઓસ્ટ્રેલિયા અને ઈંગ્લેન્ડ એકબીજા સામે ટકરાશે. આ મેચ વર્ષ 2027 માં 11 થી 15 માર્ચ દરમિયાન રમાશે.

ક્રિકેટ ઓસ્ટ્રેલિયાએ આ માહિતી આપી હતી. ઓસ્ટ્રેલિયાએ અત્યાર સુધીમાં 13 પિંક બોલ ટેસ્ટ મેચ રમી છે, જેમાંથી તેણે 12 મેચ જીતી છે. આમાંથી 8 મેચ એડિલેડમાં રમાઈ છે. 1977માં ટેસ્ટ ક્રિકેટના 100 વર્ષ પૂર્ણ થવાના પ્રસંગે ઓસ્ટ્રેલિયા અને ઈંગ્લેન્ડ વચ્ચે MCG ખાતે એક ટેસ્ટ મેચનું પણ આયોજન કરવામાં આવ્યું હતું. રસપ્રદ વાત એ હતી કે આ મેચમાં પણ ઓસ્ટ્રેલિયાએ ઇંગ્લેન્ડને 45 રનથી હરાવ્યું હતું. ત્યારે ઓસ્ટ્રેલિયન ટીમની કમાન ગ્રેગ ચેપલના હાથમાં હતી.

આ વર્ષે નવેમ્બરમાં ઈંગ્લેન્ડ સામે રમાનાર 2025-26 એશિઝ શ્રેણીને લઈને ઓસ્ટ્રેલિયા ખૂબ જ ઉત્સાહિત છે. આ વખતે ઓસ્ટ્રેલિયા એશિઝનું આયોજન કરશે. હવે એ જોવું રસપ્રદ રહેશે કે બંને ટીમોમાંથી કઈ ટીમ જીતે છે. આ પહેલા ઓસ્ટ્રેલિયન ટીમ આ વર્ષે જૂનમાં લોર્ડ્સના ઐતિહાસિક મેદાન પર વર્લ્ડ ટેસ્ટ ચેમ્પિયનશિપ (WTC) ની અંતિમ મેચ રમશે. આ ટાઇટલ મેચમાં ઓસ્ટ્રેલિયાનો મુકાબલો દક્ષિણ આફ્રિકા સામે થશે. ઓસ્ટ્રેલિયન ટીમ બીજી વખત WTCટાઇટલ જીતવાનો પ્રયાસ કરશે.