ટીમ ઈન્ડિયાની જીત બાદ ભાવુક થયો રોહિત શર્મા, કિંગ કોહલીએ તરત જ સંભાળ્યો, જુઓ વિડીયો
ટીમ ઈન્ડિયાએ બીજી સેમીફાઈનલમાં ઈંગ્લેન્ડને 68 રનથી હરાવીને 10 વર્ષ પછી T20 વર્લ્ડ કપ 2024ની ફાઇનલમાં જગ્યા બનાવી છે. આ શાનદાર જીત બાદ ભારતીય ટીમે ફાઇનલમાં પ્રવેશ કરી લીધો છે. જ્યાં તેનો સામનો દક્ષિણ આફ્રિકા સામે થશે. ટીમ ઈન્ડિયાની આ જીતમાં કેપ્ટન રોહિત શર્માએ ખૂબ મહત્વની ભૂમિકા ભજવી છે. રોહિત શર્માએ પોતાની ચતુરાઈ અને શાનદાર બેટિંગથી દરેકને પોતાના ફેન બનાવી લીધા છે. આ મેચમાં રોહિત શર્માએ 39 બોલમાં 57 રનની મહત્વની ઈનિંગ રમી અને ટીમ ઈન્ડિયાના સ્કોરને 171 રન સુધી પહોંચાડી દીધો. રોહિત શર્માની ઇનિંગ્સમાં 6 ફોર અને 2 સિક્સ સામેલ હતી.
ઈંગ્લેન્ડ સામેની આ ઐતિહાસિક જીત બાદ કેપ્ટન રોહિત શર્મા ભાવુક થયો હતો. અને તે ડ્રેસિંગ રૂમમાં રડવા લાગ્યો હતો. રોહિતનો ભાવુક થતો એક ફોટો અને વીડિયો સોશ્યલ મીડિયા પર વાયરલ થઈ રહ્યો છે. જેમાં તે પોતાની ગરદન નીચી કરીને અને હાથ વડે આંખોને મસળતો જોવા મળે છે. રોહિત શર્માને રડતો જોઈને વિરાટ કોહલી પણ તેની પાસે આવ્યો અને તેને હસાવવાનો પ્રયાસ કર્યો. રોહિતની આંખોમાંથી વહેતા આંસુએ સૌના દિલ જીતી લીધા.
ટીમ ઈન્ડિયા હવે T20 વર્લ્ડ કપ 2024ની ફાઇનલમાં દક્ષિણ આફ્રિકા સામે ટકરાશે. ભારત અને દક્ષિણ આફ્રિકા વચ્ચે T20 વર્લ્ડ કપ 2024ની ફાઇનલ મેચ 29 જૂને બાર્બાડોસમાં રમાશે.