કપિલ શર્મા સહીત આ સ્ટાર્સને મળી જાનથી મારી નાખવાની ધમકી, મુંબઇ પોલીસે તપાસ હાથ ધરી

કોમેડિયન કપિલ શર્મા, બોલિવૂડ એક્ટર રાજપાલ યાદવ સહીત ત્રણ સેલેબ્સને ધમકીભર્યા ઇમેલ મળ્યા છે. એવું માનવામાં આવે છે કે કપિલ શર્માને પાકિસ્તાન તરફથી ઈમેલ દ્વારા જાનથી મારી નાખવાની ધમકી આપવામાં આવી છે. કપિલ ઉપરાંત સુગંધા મિશ્રા, કોરિયોગ્રાફર રેમો ડિસોઝા અને રાજપાલ યાદવને પણ ધમકીભર્યા ઈમેલ મળ્યા છે. પ્રાપ્ત માહિતી અનુસાર, 'વિષ્ણુ' નામના વ્યક્તિ તરફથી એક ઈમેલ આવ્યો છે, જેણે એવો પણ દાવો કર્યો છે કે તે તમામ સ્ટાર્સની ગતિવિધિઓ પર નજર રાખી રહ્યો છે.

ઈમેલમાં કપિલ શર્મા સાથે જોડાયેલા લોકો, તેના સંબંધીઓ અને નજીકમાં રહેતા લોકોને પણ જાનથી મારી નાખવાની ધમકી આપવામાં આવી છે. આ મામલે મુંબઈ પોલીસે કલમ 351 (3) હેઠળ કેસ નોંધ્યો છે. પોલીસ એ જાણવાનો પ્રયાસ કરી રહી છે કે આ ઈમેલ કોની તરફથી મોકલવામાં આવ્યા છે. અત્યાર સુધી કપિલ શર્મા તરફથી આ અંગે કોઈ પણ પ્રકારની પ્રતિક્રિયા આવી નથી.

જોકે, અભિનેતા રાજપાલ યાદવે આ અંગે પોલીસમાં ફરિયાદ કરી છે. તેમની ફરિયાદ પર એફઆઈઆર પણ નોંધવામાં આવી છે. જ્યારે સુગંધા મિશ્રા અને રેમો ડિસોઝાને પણ ધમકીભર્યો ઈમેલ આવ્યો ત્યારે તેઓએ પોલીસમાં ફરિયાદ પણ કરી હતી. કહેવામાં આવી રહ્યું છે કે ઈમેલનું આઈપી એડ્રેસ પાકિસ્તાનનું છે. એટલું જ નહીં, ધમકીભર્યા ઈમેલમાં એવું પણ લખવામાં આવ્યું છે કે દરેકે 8 કલાકમાં જવાબ આપવાનો રહેશે. ઈમેલમાં લખ્યું છે કે તમારી દરેક ક્રિયા પર નજર રાખવામાં આવી રહી છે. તે મહત્વપૂર્ણ છે કે અમે તમારા ધ્યાન પર એક સંવેદનશીલ બાબત લાવીએ. આ કોઈ જાહેર સ્ટંટ કે તમને હેરાન કરવાનો પ્રયાસ નથી.

ઈમેલમાં તમામ સ્ટાર્સને આ મેસેજને ગંભીરતાથી લેવા અને તેને ગુપ્ત રાખવા માટે પણ કહેવામાં આવ્યું છે. જો સ્ટાર્સ આમ નહીં કરે તો તેના ગંભીર પરિણામો આવી શકે છે, જેની અસર તેમના અંગત જીવન પર પડી શકે છે. જો કે, આ પહેલીવાર નથી જ્યારે સ્ટાર્સને ધમકી આપવામાં આવી હોય. ગત વર્ષની શરૂઆતમાં પણ સલમાન ખાનને ઘણી વખત ધમકીઓ મળી હતી.