મહારાષ્ટ્રમાં મતદાર યાદીનો ચમત્કાર, 268 મતદાતાઓના એક જ પિતા !

ચૂંટણીપંચના સ્ટાફની સંડોવણીની શંકાથી રાજકીય ધમાસાણ

268 મતદારોના ‘પિતા’ એક જ છે, પરંતુ સરનામું કે દસ્તાવેજો સાચા નથી ! મહારાષ્ટ્રમાં સ્થાનિક શેતકરી કામગાર પાર્ટીના નેતા અરવિંદ મ્હાત્રેએ મતદાર યાદીની તપાસ કરીને આ ચોંકાવનારા આંકડા બહાર કાઢ્યા છે.

તેમના મતે, આ 268 નામોમાંથી મોટાભાગના ઉત્તર પ્રદેશ અને મધ્યપ્રદેશના યુવાનો છે, જે પનવેલમાં રહે છે, અને આપેલા સરનામા સાથે કોઈ સંબંધ નથી. આનાથી મતદાર યાદીમાં વ્યાપક છેતરપિંડીની શંકા ઉભી થઈ છે. મ્હાત્રેનો આરોપ છે કે, મતદાર યાદીમાં બહારના લોકોને સામેલ કરીને, ચૂંટણીને પ્રભાવિત કરવાનો પ્રયાસ કરવામાં આવી રહ્યો છે.

મહારાષ્ટ્ર નવનિર્માણ સેના (MNS) પણ આ મુદ્દે આક્રમક બની છે. પાર્ટીએ તેના સત્તાવાર ટ્વિટર ‘X’ એકાઉન્ટ પર લખ્યું છે કે, જો આ 268 નકલી મતદારો દ્વારા મતદાન કરવા આવશે, તો MNS કાર્યકરો કાર્યવાહી કરશે, અને તેમને મતદાન કરતા અટકાવશે. MNS એ પનવેલ તહસીલદાર મીનલ ભોસલે પાસેથી તાત્કાલિક સ્પષ્ટતા માંગી છે, અને ચેતવણી આપી છે કે, જો ચૂંટણી પંચના કર્મચારીઓની ભૂમિકા જાહેર થશે, તો તેમને પણ કાર્યવાહીનો સામનો કરવો પડશે.મહારાષ્ટ્રમાં મતદાર યાદીમાં ગેરરીતિઓ અંગે વિપક્ષ વારંવાર મહારાષ્ટ્ર ચૂંટણી પંચની ટીમ સાથે મુલાકાત કરી રહ્યું છે. વિપક્ષનો આરોપ છે કે, ફક્ત મુંબઈમાં જ 1.1 મિલિયન ડબલ મતદારો છે. પનવેલમાં થયેલા આ ખુલાસાથી રાજકીય ઉથલપાથલ મચી ગઈ છે.