આવતા વર્ષે દેશનો GDP 6.5 ટકાના દરે ગ્રોથ કરશે, ફુગાવામાં પણ ઘટાડાની શક્યતા: મૂડીઝ
આગામી નાણાકીય વર્ષ (2025-26)માં ભારતનો ગ્રોસ ડોમેસ્ટિક પ્રોડક્ટ (GDP) વૃદ્ધિ દર 6.5 ટકાથી વધુ રહેશે. મૂડીઝ રેટિંગ્સે આ અનુમાન લગાવ્યું છે. ચાલુ નાણાકીય વર્ષમાં ભારતીય અર્થવ્યવસ્થા 6.3 ટકાના દરે વૃદ્ધિ પામવાની ધારણા છે. મૂડીઝે બુધવારે જણાવ્યું હતું કે ઉચ્ચ સરકારી મૂડી ખર્ચ, કરવેરા અને વ્યાજદરમાં ઘટાડાથી વપરાશમાં વધારો થશે અને આગામી નાણાકીય વર્ષમાં ભારતીય અર્થતંત્ર વધુ ઝડપી ગતિએ વૃદ્ધિ પામશે. બેન્કિંગ સેક્ટર માટે સ્થિર દૃષ્ટિકોણનો અંદાજ મૂકતાં મૂડીઝે જણાવ્યું હતું કે આગામી નાણાકીય વર્ષમાં ભારતીય બેન્કોનું સંચાલન વાતાવરણ સાનુકૂળ રહેશે, તેમ છતાં તાજેતરના વર્ષોમાં નોંધપાત્ર સુધારા પછી તેમની સંપત્તિની ગુણવત્તામાં થોડો બગાડ થશે.
અસુરક્ષિત રિટેલ લોન, માઇક્રો ફાઇનાન્સ લોન અને નાના બિઝનેસ લોન પર થોડું દબાણ રહેશે. બેન્કોની નફાકારકતા પર્યાપ્ત રહેશે, કારણ કે નેટ ઈન્ટરેસ્ટ માર્જિન (NIM)માં ઘટાડો સાધારણ રહેવાની શક્યતા છે. મૂડીઝે કહ્યું કે 2024ના મધ્યમાં કામચલાઉ મંદી પછી ભારતનો આર્થિક વિકાસ ફરી તેજીની અપેક્ષા છે. આ વૈશ્વિક સ્તરે મોટી અર્થવ્યવસ્થાઓમાં સૌથી ઝડપી દરોમાંની એક નોંધણી કરશે. મૂડીઝ રેટિંગ્સે જણાવ્યું હતું કે, “ભારતની વાસ્તવિક જીડીપી વૃદ્ધિ નાણાકીય વર્ષ 2025-26માં 6.5 ટકાને વટાવી જશે, જે સરકારી મૂડી ખર્ચ, મધ્યમ-વર્ગના આવક જૂથો માટે કરમાં ઘટાડો અને વપરાશને વેગ આપવા માટે નાણાકીય સરળતા દ્વારા સંચાલિત થશે. ચાલુ નાણાકીય વર્ષમાં તે 6.3 ટકા રહેવાનો અંદાજ છે.
નાણા મંત્રાલયની આર્થિક સમીક્ષામાં, આગામી નાણાકીય વર્ષ માટે જીડીપી વૃદ્ધિ દર 6.3-6.8 ટકા રહેવાનો અંદાજ મૂકવામાં આવ્યો છે. સત્તાવાર અનુમાન મુજબ, ચાલુ નાણાકીય વર્ષમાં જીડીપી વૃદ્ધિ દર 6.5 ટકા રહેશે. દેશનો વાસ્તવિક જીડીપી વૃદ્ધિ દર જુલાઈ-સપ્ટેમ્બર 2024 ક્વાર્ટરમાં ધીમો પડીને 5.6 ટકા થયો હતો, જે આગામી ક્વાર્ટરમાં વધીને 6.2 ટકા થયો હતો. મૂડીઝને અપેક્ષા છે કે ભારતનો સરેરાશ ફુગાવાનો દર ગયા વર્ષના 4.8 ટકાથી ઘટીને નાણાકીય વર્ષ 2025-26માં 4.5 ટકા થઈ જશે. રિઝર્વ બેંક ઓફ ઈન્ડિયા (RBI)એ ફુગાવાને અંકુશમાં લેવા માટે મે, 2022 થી ફેબ્રુઆરી, 2023 સુધી તેના નીતિ દરમાં 2.50 ટકાનો વધારો કર્યો હતો, જેણે ધીરે ધીરે ઉધાર લેનારાઓ માટે વ્યાજ દરોમાં વધારો કર્યો છે. RBIએ ફેબ્રુઆરી 2025માં તેનો પોલિસી રેટ 0.25 ટકા ઘટાડીને 6.25 ટકા કર્યો હતો.
