તેલંગાણાના મુખ્યમંત્રી ગુજરાત મોડેલના આશિક: કોંગ્રેસ નેતાગણના પેટમાં ફાળ

• મોદીને મોટાભાઇ ગણાવી કહ્યું, તેઓ કેન્દ્ર સામે લડશે નહીં, ગુજરાત મોડેલને અનુસરશે

એકબાજુ કોંગ્રેસ નેતા રાહુલગાંધી અને અન્ય નેતાગણ વડાપ્રધાન નરેન્દ્ર મોદી શાસનની અને તેમની નીતિઓની ટીકા કરવા સાથે ગુજરાત મોડેલ સામે અવારનવાર સવાલો ઉઠાવી રહ્યા છે ત્યારે મહત્વના ઘટનાક્રમમાં તેલંગાણાના કોંગ્રેસી મુખ્ય પ્રધાને જુદો રાગ આલાપતા રાજકીય વિશ્ર્લેષકો લોકસભાની ચુંટણી પછી નવાજુની થવાની આગાહી કરી રહ્યા છે. તેલંગાણાના મુખ્ય પ્રધાન રેવન્ત રેડ્ડીએ વડા પ્રધાન નરેન્દ્ર મોદીને મોટા ભાઈ ગણાવ્યા છે અને કહ્યું છે કે જો તેલંગાણાનો વિકાસ કરવો હોય તો તેણે ગુજરાત મોડલને અનુસરવું પડશે.

રેડ્ડીએ સોમવારે કહ્યું હતું કે તેઓ કેન્દ્ર સરકાર સામે લડશે નહીં કારણ કે તેમણે તેલંગાણા રાજ્યના વિકાસમાં મદદ કરવા માટે પીએમ મોદીનો ટેકો માંગ્યો હતો.રેડ્ડીએ કહ્યું કે તેલંગાણા પાંચ ટ્રિલિયન ડોલરની અર્થવ્યવસ્થાના વડા પ્રધાનના સપનાને સાકાર કરવામાં હાથ મિલાવવા માંગે છે. મુખ્ય પ્રધાને જણાવ્યું હતું કે હૈદરાબાદ અને તેલંગાણા દેશના વિકાસમાં કેન્દ્રને મદદ કરશે કારણ કે તેમણે મેટ્રો રેલ પ્રોજેક્ટ માટે ભંડોળની વિનંતી કરી હતી.પીએમ મોદી લોકસભા ચૂંટણી 2024 પહેલા તેલંગાણાના પ્રવાસે છે. તેમણે ગઇકાલે તેલંગાણાના આદિલાબાદમાં રૂૂ. 56,000 કરોડથી વધુના મૂલ્યની 30 વિકાસ યોજનાઓનો શિલાન્યાસ કર્યો હતો.