શંભુ બોર્ડરે ખેડૂત આંદોલનના 200 દિવસ પૂરા, નવાજુનીના એંધાણ

મોટી સંખ્યામાં ખેડૂતો જમા થયા, કુસ્તીબાજ વિનેશ ફોગાટનું સન્માન, નવી રણનીતિ બનાવાશે

શંભુ બોર્ડર પર લાંબા સમયથી ચાલી રહેલા ખેડૂતોના આંદોલનને શનિવારે 200 દિવસ પૂર્ણ થયા છે. શંભુ બોર્ડર પર આંદોલનના 200 દિવસ પૂરા થવાના અવસરે ખેડૂતો મોટી સંખ્યામાં એકઠા થઈને મોટા પ્રદર્શનનું આયોજન કરી રહ્યા છે. ખેડૂતોના આ પ્રદર્શનમાં ઓલિમ્પિયન વિનેશ ફોગાટ પણ ભાગ લેવા પહોંચી ગઈ છે. ખેડૂતોના આ મોટા પ્રદર્શનમાં ખેડૂત આંદોલનની સમર્થક અને મહિલા કુસ્તીબાજ વિનેશ ફોગટનું ખેડૂતો દ્વારા સન્માન કરવામાં આવ્યું છે. પોલીસ-પ્રશાસન દ્વારા ખેડૂતોને દિલ્હી તરફ કૂચ કરતા અટકાવ્યા બાદ ખેડૂતો 13 ફેબ્રુઆરીથી શંભુ બોર્ડર પર બેઠા છે. ખેડૂતો સરકાર દ્વારા અન્ય મુખ્ય મુદ્દાઓની સાથે તમામ પાક માટે લઘુત્તમ ટેકાના ભાવ (ખજઙ)ની કાયદેસર ગેરંટી માંગી રહ્યા છે.

ખેડૂત નેતા સર્વનસિંહ પંઢેરે જણાવ્યું હતું કે આંદોલન શાંતિપૂર્ણ પરંતુ ખૂબ તીવ્રતાથી ચાલી રહ્યું છે. કેન્દ્ર સરકાર તેમના સંકલ્પનું પરીક્ષણ કરી રહી છે અને તેમની માંગણીઓ હજુ સુધી સંતોષવામાં આવી નથી. અમે ફરી એકવાર સરકાર સમક્ષ અમારી માંગણીઓ રજૂ કરીશું અને નવી જાહેરાતો પણ કરવામાં આવશે. તેમણે ભારપૂર્વક જણાવ્યું હતું કે, વિરોધના 200 દિવસ પૂરા થવું એ એક મહત્વપૂર્ણ સીમાચિહ્ન છે.

ખેડૂત આંદોલનકારીઓએ બોલીવુડ અભિનેત્રી અને બીજેપી સાંસદ કંગના રનૌત સામે કડક કાર્યવાહીની પણ માંગ કરી છે. તેમણે ભારતીય જનતા પાર્ટીને કંગના રનૌત સામે કડક વલણ અપનાવવા વિનંતી કરી છે, જેમની ટિપ્પણીઓએ અગાઉ ખેડૂત સમુદાયમાં વિવાદ અને વિરોધને વેગ આપ્યો છે.

ખેડૂતોએ આગામી હરિયાણા ચૂંટણી માટે તેમની વ્યૂહરચના જાહેર કરવાનો સંકેત પણ આપ્યો છે. રાજ્યના રાજકીય દ્રશ્યમાં સક્રિય ભૂમિકા ભજવવાના તેમના ઇરાદા પર ભાર મૂકતા તેઓ આગામી દિવસોમાં તેમની રણનીતિ જાહેર કરવાની યોજના ધરાવે છે.