સતિશ કૌશિકની છેલ્લી ફિલ્મ ‘કાગઝ-2’ એક માર્ચે રિલીઝ થશે

સતિશ કૌશિક, અનુપમ ખેર અને નીના ગુપ્તાને સ્ક્રીન શેર કરતા જોવાનો લ્હાવો માણવા ઈચ્છતા ફિલ્મી રસિયાઓ માટે ખુશખબર છે. દિવંગત દિગ્ગજ અભિનેતા અને નિર્દેશક સતિશ કૌશિકની છેલ્લી ફિલ્મ કાગઝ-2 થીયેટર રીલિઝ માટે તૈયાર છે. વી.કે. પ્રકાશ દ્વારા નિર્દેશિત આ ફિલ્મનું નિર્માણ સતિષ કૌશિક એન્ટરટેઈનમેન્ટ એલએલપી અને વીનસ વર્લ્ડવાઈડ એન્ટરટેઈનમેન્ટ પ્રા.લિ. દ્વારા સંયુક્ત રીતે કરાયું છે. આ ફિલ્મ 1 માર્ચે દેશભરના થીયેટર્સમાં રીલિઝ થશે.

વીનસ ફિલ્મના પ્રોડ્યુસર રતન જૈને ફિલ્મમાં વણી લેવાયેલા મેસેજની માહિતી આપતા જણાવ્યું હતું કે, બીજાનો માર્ગ અવરોધવાને બદલે તમારો પોતાનો રસ્તો બનાવો. રાજકીય રેલીઓ તથા વિરોધ પ્રદર્શનોને કારણે ટ્રાફિક જામ સર્જાય છે અને સામાન્ય માણસોને અનેક તકલીફોનો સામનો કરવો પડે છે.

અગાઉ 2021માં રીલિઝ થયેલી ફિલ્મ કાગઝને પણ લોકોએ ખૂબ વખાણી હતી. આ ફિલ્મમાં પંકજ ત્રિપાઠીની મુખ્ય ભૂમિકા હતી. હવે તેની સિક્વલમાં અનુપર ખેર સહિતના દિગ્ગજો એક સાથે રૂૂપેરી પડદા પર જોવા મળશે. કાગઝ-2નું પોસ્ટર રીલિઝ કરતી વખતે અનુપમ ખેરે પોતાના સહકલાકાર અને મિત્ર એવા સતિશ કૌશિકની યાદમાં લખેલી એક ભાવુક નોંધમાં જણાવ્યું હતું કે ડીયર સતિશ કૌશિક, તમારા મહત્ત્વાકાંક્ષી અને કમનસીબે છેલ્લાં પ્રોજેક્ટ કાગઝ-2નું ટ્રેઈલર લોન્ચ થઈ રહ્યું છે. આ ફિલ્મ બનાવવા માટે તમે ખૂબ મહેનત કરી હતી. આ ફિલ્મને અમે વિશ્વમાં વસતા તમારા તમામ ચાહકો સુધી પહોંચાડીશું. આ ફિલ્મમાં રેલીઓ અને વિરોધ પ્રદર્શનોને કારણે હેરાન થતાં સામાન્ય માણસોની મુશ્કેલીઓને રજૂ કરાઈ છે.