સંજય લીલા ભણસાલીની વેબ સિરીઝ 'હીરામંડી'ની રિલીઝ ડેટ જાહેર, આ તારીખે Netflix પર સ્ટ્રીમ થશે
પોતાની મોટા બજેટની ફિલ્મોથી દર્શકોનું મનોરંજન કરનાર ફેમસ ડિરેક્ટર સંજય લીલા ભણસાલી હવે ઓટીટી ડેબ્યૂ કરવા જઈ રહ્યા છે. તેની મલ્ટી-સ્ટારર વેબ સિરીઝ ‘હીરામંડીઃ ધ ડાયમંડ બઝાર’ની રિલીઝ ડેટ જાણવા માટે ચાહકો ખૂબ જ ઉત્સાહિત હતા. તાજેતરમાં, મુંબઈમાં મહાલક્ષ્મી રેસકોર્સ ખાતે ડ્રોન કેમેરા દ્વારા અદભૂત લાઇટ શોમાં 'હીરામંડીઃ ધ ડાયમંડ બઝાર'ના પ્રીમિયરની તારીખની જાહેરાત કરવામાં આવી હતી. તમને જણાવી દઈએ કે આ વેબ સિરીઝ 1 મે, 2024 થી OTT પ્લેટફોર્મ નેટફ્લિક્સ પર સ્ટ્રીમ થવા જઈ રહી છે.
નેટફ્લિક્સ ઈન્ડિયા દ્વારા આયોજિત આ શાનદાર ઈવેન્ટમાં અદિતિ રાવ હૈદરી સિવાય 'હીરામંડી'ની આખી સ્ટાર કાસ્ટ પણ હાજર હતી. સંજય લીલા ભણસાલી સાથે ભણસાલી પ્રોડક્શનના સીઈઓ પ્રેરણા સિંહ, 'હીરામંડી' અભિનેત્રીઓ સોનાક્ષી સિંહા, મનીષા કોઈરાલા, રિચા ચઢ્ઢા, સંજીદા શેખ, શર્મિન સહગલ અને નેટફ્લિક્સ ઈન્ડિયા સિરીઝના ડિરેક્ટર તાન્યા બામીએ 'હીરામંડી'ની રિલીઝ ડેટની જાહેરાત કરી. આ દરમિયાન ઈવેન્ટના હોસ્ટ સચિન કુંભારે અદિતિ રાવ હૈદરીના લગ્નના સમાચારની પુષ્ટિ કરતા કહ્યું કે લગ્નના કારણે અદિતિ આ ભવ્ય ઈવેન્ટમાં હાજર રહી શકી નથી.
પોતાની વેબ સિરીઝ ‘હીરામંડી’ વિશે વાત કરતા સંજય લીલા ભણસાલીએ કહ્યું, “મારા અત્યાર સુધીના કરિયરમાં મેં ઘણી મોટી ફિલ્મો કરી છે. કારણ કે મને આવી મોટી ફિલ્મો કરવી ગમે છે. હું પોતે પણ આ પ્રક્રિયાને ખૂબ એન્જોય કરું છું. મેં ક્યારેય વિચારીને મોટી ફિલ્મો નથી કરી. હું ફક્ત વાર્તાને પ્રામાણિકપણે કહેવાનો પ્રયત્ન કરું છું. હવે હું 'હીરામંડી' સાથે OTTની દુનિયામાં પ્રવેશ કરી રહ્યો છું. મેં અહીં પણ થોડું આગળ વધવાનો પ્રયાસ કર્યો છે. હીરામંડી મારો સૌથી મોટો પ્રોજેક્ટ છે. મેં આ સિરિઝ દ્વારા દર્શકો સમક્ષ કેટલાક ખાસ અનુભવ રજૂ કરવાનો પૂરો પ્રયાસ કર્યો છે અને મારા પર વિશ્વાસ કરો, આ સિરિઝ કર્યા પછી હું પોતે પણ આશ્ચર્યચકિત થઈ ગયો છું. તમને જણાવી દઈએ કે આ OTTની સૌથી મોંઘી સીરિઝ બનવા જઈ રહી છે. રિપોર્ટ અનુસાર તેનું બજેટ 200 કરોડ રૂપિયાની આસપાસ છે.