દિલ્હીમાં લાગુ થશે રાષ્ટ્રપતિ શાસન? ભાજપ ધારાસભ્યોની માંગ પર રાષ્ટ્રપતિએ લીધો મોટો નિર્ણય

એક્સાઈઝ પોલિસીમાં કથિત ગોટાળાને લઈને મુખ્યમંત્રી અરવિંદ કેજરીવાલ જેલમાં બંધ હોવાથી દિલ્હીમાં રાષ્ટ્રપતિ શાસન લાગુ થવાનો ખતરો છે. જો કે, આમ આદમી પાર્ટીએ વારંવાર પુનરોચ્ચાર કર્યો છે કે સીએમ કેજરીવાલ જેલમાંથી દિલ્હી સરકાર ચલાવશે.

દિલ્હી ભાજપના ધારાસભ્યોએ કેજરીવાલ સરકારને બરતરફ કરવાની માંગ કરી છે. આ સંદર્ભે દિલ્હી ભાજપના ધારાસભ્યોએ રાષ્ટ્રપતિ દ્રૌપદી મુર્મુને મળ્યા હતા અને તેમને એક મેમોરેન્ડમ આપ્યું હતું. હવે રાષ્ટ્રપતિના સચિવાલયે આ અંગે સંજ્ઞાન લીધું છે. ભાજપના ધારાસભ્યોએ બંધારણીય સંકટને ટાંકીને દિલ્હી સરકારને બરતરફ કરવાની માંગ કરી છે. પત્રમાં દિલ્હીના મુખ્યમંત્રી અરવિંદ કેજરીવાલના જેલમાં હોવાનો પણ ઉલ્લેખ કરવામાં આવ્યો છે. રાષ્ટ્રપતિ કાર્યાલયે આ પત્ર કેન્દ્રીય ગૃહ મંત્રાલયને મોકલી આપ્યો છે. આવી સ્થિતિમાં રાજકીય વર્તુળોમાં એવો ગણગણાટ ચાલી રહ્યો છે કે રાજધાની દિલ્હીમાં રાષ્ટ્રપતિ શાસન લાદવામાં આવી શકે છે. ભાજપના ધારાસભ્યોનું આ મેમોરેન્ડમ રાષ્ટ્રપતિ સચિવાલય દ્વારા કેન્દ્રીય ગૃહ મંત્રાલયને મોકલવામાં આવ્યા બાદ આ શક્યતાઓને વધુ બળ મળ્યું છે.

દિલ્હી સરકારને બરખાસ્ત કરવાની માંગ સાથે બીજેપી ધારાસભ્યો 30 ઓગસ્ટે રાષ્ટ્રપતિ મુર્મુને મળ્યા હતા. આ અંગે તેમને એક મેમોરેન્ડમ આપવામાં આવ્યું હતું. આ માંગ ભાજપના નેતા વિજેન્દ્ર ગુપ્તાના નેતૃત્વમાં ભાજપના ધારાસભ્યોએ ઉઠાવી હતી. આ દરમિયાન વિજેન્દ્ર ગુપ્તાએ કહ્યું કે દિલ્હી દરેક વરસાદમાં ડૂબી જાય છે, દિલ્હીમાં આયુષ્માન ભારત યોજના લાગુ કરવામાં આવી નથી અને હજારો કરોડ રૂપિયાનું ફંડ બંધ થઈ ગયું છે. મુખ્યમંત્રી અરવિંદ કેજરીવાલ જેલમાં હોવાથી સરકાર કામ કરી રહી નથી. અમે રાષ્ટ્રપતિને વિનંતી કરીએ છીએ કે દિલ્હી સરકારને બરતરફ કરો જેથી કરીને દિલ્હીના લોકોના હિત માટે તેની કામગીરી અને વિકાસ પુનઃસ્થાપિત કરી શકાય.

વિજેન્દર ગુપ્તા દિલ્હીના ભાજપના ધારાસભ્યો અને AAPના ભૂતપૂર્વ ધારાસભ્ય અને મંત્રી રાજ કુમાર આનંદ સાથે રાષ્ટ્રપતિને મળ્યા હતા. તેમણે કહ્યું, 'અરવિંદ કેજરીવાલે દિલ્હીવાસીઓનું જીવન મુશ્કેલ બનાવી દીધું છે કારણ કે કોઈ સરકારી વિભાગ અસરકારક રીતે કામ કરી રહ્યું નથી. દિલ્હી જલ બોર્ડ દેવામાં ડૂબી ગયું છે, રસ્તાઓની હાલત ખરાબ છે, કૌભાંડો પછી કૌભાંડો થઈ રહ્યા છે. જેલના સળિયા પાછળ હોવા છતાં સત્તામાં રહેવાની લાલચે રાષ્ટ્રીય રાજધાનીમાં ઘણી સમસ્યાઓ ઊભી કરી છે.