કર્ણાટક ધારાસભામાં પાક. ઝિંદાબાદ: ત્રણની ધરપકડ

ગયા અઠવાડિયે રાજ્યસભાની ચૂંટણીમાં કોંગ્રેસના ઉમેદવારની જીત બાદ કર્ણાટક વિધાનસભાની અંદર પાકિસ્તાન તરફી નારા લગાવવા બદલ ત્રણ લોકોની ધરપકડ કરવામાં આવી છે. ધરપકડ કરાયેલા ત્રણની ઓળખ દિલ્હીના ઇલ્થાજ, બેંગલુરુના આરટી નગરના મુનવ્વર અને હાવેરીના બ્યાદાગીના મોહમ્મદ શફી તરીકે કરવામાં આવી છે. 27 ફેબ્રુઆરીએ રાજ્યસભાની ચૂંટણીમાં કોંગ્રેસના નેતા સૈયદ નસીર હુસૈનની જીતની ઉજવણી દરમિયાન વિધાનસભાની અંદર પાકિસ્તાન તરફી સૂત્રોચ્ચાર કરવામાં આવ્યા હતા. કોંગ્રેસે આ દાવાઓને ફગાવી દીધા હતા અને કહ્યું હતું કે તેના કાર્યકરો માત્ર હુસૈનના સમર્થનમાં નાસિર સાહેબ ઝિંદાબાદના નારા લગાવી રહ્યા હતા.
મુખ્યમંત્રી સિદ્ધારમૈયાની આગેવાની હેઠળની સરકારે આરોપોની સત્યતા ચકાસવા માટે કર્ણાટક ફોરેન્સિક સાયન્સ લેબોરેટરી દ્વારા વીડિયોની તપાસ કરાવી હતી. ફોરેન્સિક રિપોર્ટમાં એ વાતની પુષ્ટિ થઈ છે કે આ ઘટનાના વિડિયો સાથે છેડછાડ કરવામાં આવી નથી અને એસેમ્બલીમાં પાકિસ્તાન તરફી સૂત્રોચ્ચાર કરવામાં આવ્યા હતા.કર્ણાટક વિધાનસભામાં પાકિસ્તાન ઝિંદાબાદના નારા લગાવનાર એક આરોપી સાથે કોંગ્રેસના નવા ચૂંટાયેલા રાજ્યસભા સાંસદ સૈયદ નસીર હુસૈનનો ફોટો વાયરલ થયો છે.