ઉપરાષ્ટ્રપતિની ચૂંટણીમાં રાધાકૃષ્ણન સામે વિપક્ષનું ‘સુદર્શન’ ચક્ર

એનડીએના ઉમેદવાર સામે સુપ્રીમ કોર્ટના પૂર્વ ન્યાયાધીશ બી.સુદર્શન રેડ્ડીની જાહેરાત કરી વૈચારિક જંગ જાહેર કર્યો

પૂર્વ ન્યાયાધીશ જસ્ટિસ બી. સુદર્શન રેડ્ડી ઉપરાષ્ટ્રપતિ પદ માટે વિપક્ષના ઉમેદવાર હશે. કોંગ્રેસ પ્રમુખ મલ્લિકાર્જુન ખડગેએ તેમના નામની જાહેરાત કરી. તેમણે કહ્યું કે સુપ્રીમ કોર્ટના ભૂતપૂર્વ ન્યાયાધીશના નામ પર વિપક્ષ સર્વસંમતિથી સંમત થઈ ગયું છે. અગાઉ, વિપક્ષી ગઠબંધન ઈન્ડિયાના નેતાઓએ ઉપરાષ્ટ્રપતિ પદ માટે ઉમેદવારનું નામ નક્કી કરવા અને જાહેર કરવા માટે 10 રાજાજી માર્ગ ખાતે બેઠક યોજી હતી. બેઠક બાદ, વિપક્ષે તેમના નામની જાહેરાત કરી. સુપ્રીમ કોર્ટના ભૂતપૂર્વ ન્યાયાધીશ જસ્ટિસ બી. સુદર્શન રેડ્ડી 21 ઓગસ્ટે પોતાનું નામાંકન દાખલ કરશે.

મલ્લિકાર્જુન ખડગેએ કહ્યું, બી. સુદર્શન રેડ્ડી ભારતના સૌથી પ્રતિષ્ઠિત અને પ્રગતિશીલ ન્યાયશાસ્ત્રીઓમાંના એક છે. તેમની લાંબી અને પ્રતિષ્ઠિત કાનૂની કારકિર્દી રહી છે. તેમણે આંધ્ર પ્રદેશ હાઈકોર્ટના ન્યાયાધીશ, ગૌહાટી હાઈકોર્ટના મુખ્ય ન્યાયાધીશ અને સુપ્રીમ કોર્ટના ન્યાયાધીશ તરીકે સેવા આપી છે. તેઓ સામાજિક, આર્થિક અને રાજકીય ન્યાયના સતત અને હિંમતવાન સમર્થક રહ્યા છે. તેઓ ગરીબો તરફી વ્યક્તિ છે. જો તમે તેમના ઘણા ચુકાદાઓ વાંચો છો, તો તમને ખબર પડશે કે તેમણે કેવી રીતે ગરીબોનો પક્ષ લીધો અને બંધારણ અને મૂળભૂત અધિકારોનું રક્ષણ કર્યું.ભૂતપૂર્વ ન્યાયાધીશ બી. સુદર્શન રેડ્ડી રાષ્ટ્રીય લોકશાહી જોડાણના ઉમેદવાર સીપી રાધાકૃષ્ણનનો સામનો કરશે. વિપક્ષી જોડાણ દ્વારા તેમના નામની જાહેરાત થયા પછી, તેમણે કહ્યું કે હું તમામ પક્ષોને સમર્થન માટે અપીલ કરું છું.

ન્યાયાધીશ બી. સુદર્શન રેડ્ડીનો જન્મ 8 જુલાઈ, 1946ના રોજ રંગારેડ્ડી (આંધ્રપ્રદેશ) ના પૂર્વ ઇબ્રાહિમપટ્ટનમ તાલુકામાં આવેલા અકુલા મૈલારામ ગામમાં થયો હતો. તેઓ હાલ કંદુકુર મહેસૂલ વિભાગ હેઠળ આવતા ગામના ખેડૂત પરિવારમાં રહેતા હતા. તેમણે હૈદરાબાદમાં અભ્યાસ કર્યો હતો અને 1971માં હૈદરાબાદની ઓસ્માનિયા યુનિવર્સિટીમાંથી કાયદાની ડિગ્રી મેળવી હતી. 1971માં જ તેમણે વકીલ તરીકે પ્રવેશ મેળવ્યો હતો. ત્યારબાદ, તેઓ વરિષ્ઠ વકીલ કે. પ્રતાપ રેડ્ડીના ચેમ્બરમાં જોડાયા હતા.

તેમણે હૈદરાબાદની મ્યુનિસિપલ સિવિલ કોર્ટ તેમજ આંધ્રપ્રદેશ હાઇકોર્ટમાં અનેક કેસ સંભાળ્યા હતા. 8 ઓગસ્ટ, 1988ના રોજ તેમને આંધ્રપ્રદેશ હાઇકોર્ટમાં સરકારી વકીલ તરીકે નિયુક્ત કરવામાં આવ્યા હતા. તેઓ મહેસૂલ વિભાગના પ્રભારી પણ હતા અને 8 જાન્યુઆરી, 1990 સુધી આ પદ સંભાળ્યું હતું. ત્યારબાદ, તેમને થોડા સમય માટે કેન્દ્ર સરકારના વધારાના સ્થાયી સલાહકાર તરીકે પણ નિયુક્ત કરવામાં આવ્યા હતા.
2 મે, 1995થી આંધ્ર પ્રદેશ હાઈકોર્ટના ન્યાયાધીશ તરીકે નિયુક્ત થયા. 2005માં તેમને ગૌહાટી હાઈકોર્ટના મુખ્ય ન્યાયાધીશ તરીકે નિયુક્ત કરવામાં આવ્યા. 2007માં તેમને સુપ્રીમ કોર્ટના ન્યાયાધીશ તરીકે નિયુક્ત કરવામાં આવ્યા. 2011માં તેઓ નિવૃત્ત થયા.

રાધાકૃષ્ણનને રાજરમત નથી આવડતી: મોદી
NDA સંસદીય પક્ષની બેઠકમાં વડા પ્રધાન નરેન્દ્ર મોદીએ સંબોધન કર્યું. NDAના ઉપરાષ્ટ્રપતિ પદના ઉમેદવાર સીપી રાધાકૃષ્ણનનો ઔપચારિક પરિચય બેઠકમાં કરાવવામાં આવ્યો. વડા પ્રધાને તેમનું સન્માન પણ કર્યું. સંસદના પુસ્તકાલય ભવનમાં યોજાયેલી આ બેઠકમાં સીપી રાધાકૃષ્ણન હાજર રહ્યા હતા અને સાંસદોને મળ્યા હતા.બેઠક દરમિયાન, વડા પ્રધાને NDAના ઉપરાષ્ટ્રપતિ પદના ઉમેદવાર સીપી રાધાકૃષ્ણન વિશે કહ્યું કે તેઓ OBC સમાજમાંથી આવતા એક પાયાના નેતા છે, ખૂબ જ સરળ સ્વભાવના છે અને રાજકારણને રમત તરીકે લેતા નથી.NDA સંસદીય પક્ષની બેઠકમાં વડા પ્રધાન નરેન્દ્ર મોદીએ સિંધુ જળ સંધિ પર જોરદાર પ્રહાર કર્યા. તેમણે કહ્યું કે પંડિત જવાહરલાલ નહેરુએ પહેલા દેશનું વિભાજન કર્યું અને પછી પાણીનું પણ વિભાજન કર્યું.પીએમ મોદીએ કહ્યું, સિંધુ જળ સંધિ હેઠળ, 80 ટકા પાણી પાકિસ્તાનને સોંપવામાં આવ્યું હતું. બાદમાં, નેહરુએ તેમના સચિવ દ્વારા આ ભૂલ સ્વીકારી અને કહ્યું કે તેનો કોઈ ઉપયોગ થયો નથી. આ સંધિ સંપૂર્ણપણે ખેડૂત વિરોધી હતી.