જન્મદિવસે જ ભજનલાલ શર્માએ રાજસ્થાનના મુખ્યમંત્રી તરીકે કર્યા શપથગ્રહણ, દિયા- પ્રેમચંદ બન્યા ડેપ્યુટી સીએમ

રાજસ્થાનમાં ભાજપને પ્રચંડ જીત મળ્યા બાદ હવે આજે મુખ્યમંત્રી તરીકે ભજનલાલ શર્માએ શપથ લીધા આ સમારોહ ઐતિહાસિક આલ્બર્ટ હોલની બહાર યોજાયો હતો. શપથ ગ્રહણ સમારોહમાં પીએમ નરેન્દ્ર મોદીએ પણ હાજરી આપી હતી. આ કાર્યક્રમમાં પીએમ મોદી ઉપરાંત ગૃહમંત્રી અમિત શાહ, બીજેપી અધ્યક્ષ જેપી નડ્ડા પણ હાજર હતા.આજે ભજનલાલ શર્માનો જન્મદિવસ પણ છે. આ તેમનો 56મો જન્મદિવસ છે.

રાજ્યપાલ કલરાજ મિશ્રાએ ભજનલાલ શર્માને મુખ્યમંત્રી પદના શપથ લેવડાવ્યા હતા. તેમજ દિયા કુમારી અને પ્રેમચંદ બૈરવા રાજ્યના નાયબ મુખ્યમંત્રી બન્યા. શપથ ગ્રહણ સમારોહમાં 6 રાજ્યોના મુખ્યમંત્રીઓએ પણ ભાગ લીધો હતો. આ સિવાય પૂર્વ મુખ્યમંત્રી અશોક ગેહલોત અને વસુંધરા રાજે પણ મંચ પર હાજર હતા.

ભજન કેબિનેટમાં 2 નવા મંત્રી

ભજનલાલ ઉપરાંત આજે ધારાસભ્ય દિયા કુમારી અને પ્રેમચંદ બૈરવાએ કેબિનેટ સભ્યો તરીકે શપથ લીધા હતા. ભારતીય જનતા પાર્ટી (BJP)એ બંનેને નાયબ મુખ્યમંત્રી પદ માટે નામાંકિત કર્યા હતા. રાજ્યપાલ કલરાજ મિશ્રાએ આ ત્રણેય નેતાઓને પદ અને ગોપનીયતાના શપથ લેવડાવ્યા હતા.

શપથ સમારોહ પહેલા રાજ્યના નવા સીએમ ભજનલાલ શર્માએ ગોવિંદ દેવજી મંદિરની મુલાકાત લીધી હતી અને ટોંક રોડ પર પિંજરાપોળ ગૌશાળામાં ગાયોને ચારો ખવડાવ્યો હતો. આ પહેલા તેમણે પોતાના દિવસની શરૂઆત પ્રખ્યાત ગોવિંદ દેવજી મંદિરમાં પ્રાર્થનાથી કરી હતી. બાદમાં તે ગૌશાળામાં પણ ગયો હતો. અહીંથી ઘરે પહોંચીને માતા-પિતાના આશીર્વાદ લીધા હતા.

રાજસ્થાનમાં 200 સભ્યોમાંથી 199 બેઠકો પર યોજાયેલી ચૂંટણીમાં ભાજપે 115 બેઠકો જીતી હતી. જ્યારે કરણપુર બેઠક પર કોંગ્રેસના ઉમેદવારના મૃત્યુને કારણે ચૂંટણી મોકૂફ રાખવામાં આવી હતી, અહીં 5 જાન્યુઆરીએ મતદાન થશે.