નાસાના રિપોર્ટમાં ધડાકો, સુનિતા વિલિયમ્સના અવકાશયાનમાં પહેલેથી જ ખામી

આઠ દિવસની યાત્રા આઠ મહિનામાં ફેરવાઇ શકે, બોઇંગે આક્ષેપો નકાર્યા

નાસાના ભારતીય મૂળના અવકાશયાત્રી સુનિતા વિલિયમ્સ અને બેરી બૂચ વિલ્મોર માત્ર આઠ દિવસ માટે ઈન્ટરનેશનલ સ્પેસ સ્ટેશન (આઇએસએસ) ગયા હતા. જો કે, બોઇંગ સ્ટારલાઇનર કેપ્સ્યુલમાં ખામીને કારણે ઈન્ટરનેશનલ સ્પેસ સ્ટેશનમાં ફસાયા છે. તેમનું પરત કરવું હજી શક્ય બન્યું નથી.

અમેરિકન સ્પેસ એજન્સી નાસા દ્વારા કહેવામાં આવી રહ્યું છે કે સપ્ટેમ્બરમાં તેમને પૃથ્વી પર લાવવાનો પ્રયાસ કરવામાં આવશે.
જો કે તેમની આઠ દિવસની યાત્રા આઠ મહિનામાં ફેરવાઈ શકે છે. શક્ય છે કે બંને અવકાશયાત્રીઓ આવતા વર્ષે એટલે કે ફેબ્રુઆરી 2025માં પાછા ફરે. નાસાએ હવે અવકાશમાં ફસાયેલા ભારતીય મૂળના અમેરિકન અવકાશયાત્રીના કેસની તપાસ શરૂૂ કરી છે. નાસાના ઓફિસ ઓફ ઈન્સ્પેક્ટર જનરલના અહેવાલમાં બોઈંગની ભારે ટીકા કરવામાં આવી છે. એવું કહેવામાં આવ્યું છે કે બોઇંગની ભૂલો અને બેદરકારીના કારણે બે અવકાશયાત્રીઓ ઇન્ટરનેશનલ સ્પેસ સ્ટેશન પર ફસાયેલા છે.

બુધવારે જાહેર કરાયેલા આ રિપોર્ટમાં નાસાએ કહ્યું કે બોઇંગ ગુણવત્તા નિયંત્રણના માપદંડોને પૂર્ણ કરવામાં અસમર્થ રહી છે. આ રિપોર્ટના આધારે નાસાએ પેન્ટાગોન પાસે બોઈંગ પર નાણાકીય દંડ લગાવવાની પણ માંગ કરી છે. રિપોર્ટમાં કહેવામાં આવ્યું છે કે બોઇંગે તેના સ્ટારલાઇનર સ્પેસક્રાફ્ટના ઉત્પાદન અંગે સંપૂર્ણ સત્ય જણાવ્યું નથી, જેના દ્વારા બંને અવકાશયાત્રીઓને અવકાશમાં લઈ જવામાં આવ્યા હતા. બંને મુસાફરોનું મિશન માત્ર 9 દિવસનું હતું પરંતુ ટેકનિકલ ખામીને કારણે હવે આ મિશન ફેબ્રુઆરી 2025 સુધી લંબાવવામાં આવ્યું છે. આ પહેલા તે જૂન 2024માં જ પૃથ્વી પર પરત ફરવાના હતા. નાસાના રિપોર્ટ અનુસાર, સ્ટારલાઈનર સ્પેસક્રાફ્ટની સૌથી ચિંતાજનક બાબત એ છે કે તેની લિક્વિડ ઓક્સિજન ફ્યુઅલ ટેન્ક રોકેટના ઉપરના ભાગમાં જોડાયેલી હતી, જે રોકેટના પ્રોપેલન્ટ માટે સૌથી મહત્વપૂર્ણ છે. વેલ્ડીંગની સ્થિતિ નબળી હતી અને હાર્ડવેર પણ ખોટી રીતે જોડાયેલ હતું. આ તમામ કારણોને લીધે તેની ગુણવત્તા અંગે ચિંતા વધુ વધી છે.

નાસાના અહેવાલ પર પ્રતિક્રિયા આપતા બોઇંગે કહ્યું છે કે અમે ફક્ત નાનામાં નાના જોખમનો સામનો કરવાનો પ્રયાસ કરી રહ્યા છીએ. વેલ્ડીંગની સમસ્યાઓ અંગે અહેવાલમાં જણાવાયું છે કે આ કામ બોઇંગના બિનઅનુભવી એન્જિનિયરો, ઓછી કાર્યક્ષમતા અને ઉતાવળને કારણે થયું હતું. રિપોર્ટમાં કહેવામાં આવ્યું છે કે જો બોઇંગ એવા ઉત્પાદનોનું ઉત્પાદન કરવાનું ચાલુ રાખે છે જે નાસાના ધોરણોને પૂર્ણ કરતા નથી, તો તેની સામે કાર્યવાહી કરવામાં આવશે.

અવકાશયાત્રીઓને કોઈ ખતરો નથી
નાસાના રિપોર્ટમાં અવકાશયાન અંગે ચિંતા વ્યક્ત કરવામાં આવી છે, પરંતુ નાસા દ્વારા જારી કરવામાં આવેલા નિવેદનમાં કહેવામાં આવ્યું છે કે અવકાશયાત્રીઓને કોઈ ખતરો નથી, તેઓ હાલમાં સ્પેસ સ્ટેશનમાં છે. તે ત્યાં ફસાયેલો નથી અને સ્ટારલાઈનર અવકાશયાન પણ જો જરૂૂરી હોય તો કટોકટીમાં તેને પરત લાવવા માટે સક્ષમ છે. નાસાએ કહ્યું કે કેટલીક ખામીઓ સાથે, સ્ટારલાઇનર હજુ પણ ઉપયોગી અને ખૂબ જ મજબૂત છે. અમે અવકાશયાનમાં સમારકામનું કામ કરી રહ્યા છીએ અને તેને સંપૂર્ણપણે સુરક્ષિત બનાવવા માટે રોકાયેલા છીએ. આ સાથે, અમે અન્ય વિકલ્પો પણ જોઈ રહ્યા છીએ, જે વિકલ્પ સૌથી સુરક્ષિત હશે, અમે તેના દ્વારા અવકાશયાત્રીઓને પૃથ્વી પર પાછા લાવીશું.