પીએમ તરીકે મોદી હોટ ફેવરિટ, પણ ભાજપને એકલા હાથે સત્તા ન મળે

મૂડ ઓફ ધ નેશન સરવે મુજબ લોકસભાની આજે ચૂંટણી થાય તો ભાજપને 267, કોંગ્રેસને 97 બેઠકો: ફેબ્રુઆરી કરતા ભાજપનો ગ્રાફ નીચે

જો આજે ચૂંટણી થાય તો ભારતીય જનતા પાર્ટી (ભાજપ) સૌથી વધુ બેઠકો જીતી શકે છે. એક સર્વેમાં આ વાત સામે આવી છે. સર્વે મુજબ, ભાજપને 260 અને કોંગ્રેસને 97 બેઠકો મળવાની ધારણા છે. NDAને 324 બેઠકો મળી શકે છે અને ઇન્ડિયા બ્લોકને 208 બેઠકો મળી શકે છે.

ઇન્ડિયા ટુડે ગ્રુપ અને ઈ વોટરના મૂડ ઓફ ધ નેશન (MOTN) સર્વેમાં જાણવા મળ્યું છે કે જો આજે ચૂંટણી થાય તો ભાજપને મહત્તમ 260 બેઠકો મળી શકે છે. કોંગ્રેસને 97 બેઠકો મળવાની શક્યતા છે. ફેબ્રુઆરી 2025માં કરવામાં આવેલા છેલ્લા સર્વેમાં ભાજપને 281 બેઠકો અને કોંગ્રેસને 78 બેઠકો મળવાનો અંદાજ હતો. મતલબ કે ભાજપની બેઠકોની સંખ્યામાં થોડો ઘટાડો થયો છે, જ્યારે કોંગ્રેસની બેઠકોની સંખ્યામાં વધારો થયો છે.

આ બધા મુદ્દાઓ પર, સર્વેમાં એ પણ પૂછવામાં આવ્યું હતું કે જો આજે ચૂંટણી થાય, તો કયા પક્ષને કેટલા મત મળશે. જવાબમાં જાણવા મળ્યું કે NDA ને 47% મત મળી શકે છે, જ્યારે ઇન્ડિયા બ્લોકને 41% મત મળવાની શક્યતા છે.

લોકોને એ પણ પૂછવામાં આવ્યું હતું કે ભારત ગઠબંધનના નેતા તરીકે શ્રેષ્ઠ ચહેરો કોણ છે? 28% લોકો રાહુલ ગાંધીને શ્રેષ્ઠ માનતા હતા. 8% લોકો મમતા બેનર્જી અને 7% લોકો અખિલેશ યાદવને શ્રેષ્ઠ ચહેરો માનતા હતા. રાહુલ ગાંધી હજુ પણ ભારત ગઠબંધનમાં સૌથી લોકપ્રિય નેતા છે.

સર્વેમાં ભાગ લેનારા 52% લોકોએ કહ્યું કે નરેન્દ્ર મોદી આગામી પીએમ તરીકે સૌથી યોગ્ય છે. આ આંકડો દર્શાવે છે કે મોદી હજુ પણ દેશના સૌથી લોકપ્રિય નેતા છે. વડાપ્રધાન તરીકે નરેન્દ્ર મોદીના પ્રદર્શન વિશે વાત કરીએ તો, સર્વેમાં 34% લોકોએ તેને ખૂબ જ સારું ગણાવ્યું છે. જ્યારે 13% લોકોએ તેને ખરાબ અને 14% લોકોએ તેને ખૂબ જ ખરાબ ગણાવ્યું છે.

સર્વેમાં, 25% લોકોએ કોંગ્રેસના સાંસદ અને વિપક્ષી નેતા રાહુલ ગાંધીને આગામી પીએમ તરીકે શ્રેષ્ઠ ચહેરો ગણાવ્યા છે. વિરોધ પક્ષના નેતા તરીકે રાહુલ ગાંધીના પ્રદર્શન વિશે વાત કરીએ તો, સર્વેમાં 28% લોકોએ તેને ખૂબ જ સારું, 22% લોકોએ તેને સારું અને 16% લોકોએ તેને સરેરાશ ગણાવ્યું છે. જોકે, 15% લોકોએ તેમનું પ્રદર્શન ખરાબ અને 12% લોકોએ તેને ખૂબ જ ખરાબ ગણાવ્યું છે.

મોદીના ઉત્તરાધિકારી તરીકે શાહ આગળ, યોગી પાછળ
નરેન્દ્ર મોદી પછી પ્રધાનમંત્રી પદ માટે પસંદગી વિશે પૂછવામાં આવતા, 28 ટકા લોકોએ અમિત શાહનું નામ લીધું છે. આ પછી, લોકોની પસંદગી યોગી આદિત્યનાથ છે. 26 ટકા લોકો યોગી આદિત્યનાથને પીએમ પદના દાવેદાર માને છે. 7 ટકા લોકોએ કેન્દ્રીય માર્ગ પરિવહન મંત્રી નીતિન ગડકરીને પીએમ પદના આગામી દાવેદાર ગણાવ્યા છે.

દેશના લોકપ્રિય મુખ્યમંત્રીઓની યાદીમાં યોગી પ્રથમ, મમતા બીજા નંબરે
હાલમાં દેશના સૌથી લોકપ્રિય મુખ્યમંત્રીઓની યાદીમાં ઉત્તર પ્રદેશના મુખ્યમંત્રી યોગી આદિત્યનાથનું નામ ટોચ પર છે. સર્વે મુજબ, 36 ટકા લોકોએ યોગી આદિત્યનાથને દેશના સૌથી લોકપ્રિય મુખ્યમંત્રી ગણાવ્યા છે. તે જ સમયે, આ યાદીમાં બીજું નામ ભાજપના કટ્ટર હરીફ પક્ષના મુખ્યમંત્રીનું છે. 13 ટકા લોકોએ ઝખઈના સ્થાપક અને પશ્ચિમ બંગાળના મુખ્યમંત્રી મમતા બેનર્જીને સૌથી લોકપ્રિય મુખ્યમંત્રી ગણાવ્યા છે. યાદીમાં ત્રીજું નામ આંધ્ર પ્રદેશના મુખ્યમંત્રી ચંદ્રબાબુ નાયડુનું છે, જેમને 7 ટકા લોકોએ સૌથી લોકપ્રિય મુખ્યમંત્રી ગણાવ્યા છે. ખાસ વાત એ છે કે ભારતભરના વિવિધ રાજ્યોના લોકોએ સર્વેમાં ભાગ લીધો હતો. સર્વેમાં ફક્ત રાજ્યના લોકો પાસેથી મંતવ્યો લેવામાં આવ્યા હતા, પરંતુ આસામના મુખ્યમંત્રી હિમંતા બિસ્વા શર્માને સૌથી લોકપ્રિય મુખ્યમંત્રી જાહેર કરવામાં આવ્યા હતા. નાના રાજ્યોની વાત કરીએ તો, સિક્કિમના મુખ્યમંત્રી પ્રેમ સિંહ તમાંગ 54 ટકા મત સાથે સૌથી લોકપ્રિય મુખ્યમંત્રી હતા. અરુણાચલ પ્રદેશના મુખ્યમંત્રી પેમા ખાંડુ 42 ટકા મત સાથે બીજા ક્રમે હતા અને ત્રિપુરાના મુખ્યમંત્રી 40 ટકા મત સાથે ત્રીજા ક્રમે હતા.