પ્રોવિડન્ટ ફંડના સભ્યોનું લઘુત્તમ પેન્શન 2500 થઇ જશે

EPFOના બોર્ડની બેઠકમાં થશે નિર્ણય

કર્મચારી ભવિષ્ય નિધિ સંગઠન (EPFO)ના આશરે 30 લાખથી વધુ પેન્શનરો માટે એક આશાસ્પદ સમાચાર આવી રહ્યા છે. કર્મચારી પેન્શન યોજના 1995 (EPS-95) હેઠળ મળતું લઘુતમ માસિક પેન્શનની રકમ ₹1,000 થી વધારીને ₹2,500 થઈ શકે છે. આ મહત્ત્વનો નિર્ણય 10-11 ઓક્ટોબરના રોજ બેંગલુરુમાં યોજાનારી EPFOના સેન્ટ્રલ બોર્ડ ઓફ ટ્રસ્ટીઝ (CBT)ની બેઠકમાં લેવામાં આવવાની શક્યતા છે.

જો આ પ્રસ્તાવ પસાર થશે, તો તે છેલ્લા 11 વર્ષમાં પહેલો વધારો હશે, કારણ કે 2014માં આ રકમ ₹1,000 નક્કી કરવામાં આવી હતી. આ બેઠકમાં EPFO 3.0 હેઠળ ડિજિટલ સુધારાઓ પર પણ ચર્ચા થવાની છે.

EPFOના પેન્શનરો લાંબા સમયથી લઘુતમ માસિક પેન્શનમાં વધારો કરવાની માંગ કરી રહ્યા છે, જે હાલમાં ₹1,000 જેટલું નિશ્ચિત છે. CBTની આગામી બેઠકમાં આ રકમને વધારીને ₹2,500 કરવાનો પ્રસ્તાવ રજૂ થઈ શકે છે. જો આ પ્રસ્તાવને લીલી ઝંડી મળે છે, તો દેશના 30 લાખથી વધુ નિવૃત્ત કર્મચારીઓને સીધો લાભ મળશે અને તેમની નિવૃત્તિ પછીની આર્થિક સુરક્ષામાં નોંધપાત્ર સુધારો થશે. નોંધનીય છે કે, વર્ષ 2014માં આ લઘુતમ પેન્શન મર્યાદા નક્કી થયા પછી આજ સુધી તેમાં કોઈ ફેરફાર કરવામાં આવ્યો નથી.

કોઈપણ કર્મચારી કે જેણે ઓછામાં ઓછાં 10 વર્ષની સતત સેવા પૂરી કરી હોય અને 58 વર્ષની ઉંમરે પહોંચે, તે EPS-95 હેઠળ નિયમિત પેન્શન મેળવવા માટે પાત્ર બને છે. જો કોઈ સભ્ય નોકરી અધવચ્ચે છોડી દે છે, તો તે પોતાના જમા થયેલા પેન્શન ફંડને ઉપાડી શકે છે અથવા ઓછી રકમ સાથે પેન્શન મેળવવાનો વિકલ્પ પસંદ કરી શકે છે.