લાહોર ગેસ ચેમ્બરમાં ફેરવાયું, 15 હજાર લોકો હોસ્પિટલમાં

એર ક્વોલિટી ઇન્ડેક્સ 1900ના ભયાનક સ્તરે, લોકોને શ્ર્વાસ લેવામાં પણ તકલીફ, લગ્ન પ્રસંગો ઉપર 3 મહિનાનો પ્રતિબંધ

પાકિસ્તાનનું લાહોર વિશ્વનું સૌથી પ્રદૂષિત શહેર બની ગયું છે. જ્યાં સર્વત્ર ઝેરી ધુમાડાથી લોકો પરેશાન છે. અહેવાલો અનુસાર, શ્વાસ લેવામાં તકલીફ, અસ્થમા અને અન્ય શ્વસન સમસ્યાઓના કારણે લગભગ 15,000 દર્દીઓને હોસ્પિટલમાં દાખલ કરવામાં આવ્યા છે. એક સમયે હરિયાળી અને સુંદર બગીચાઓ માટે જાણીતું લાહોર હવે વાયુ પ્રદૂષણને કારણે શ્વાસ લેવું મુશ્કેલ બની રહ્યું છે. આ સમસ્યાના મુખ્ય કારણોમાં વાહનોનું ઉત્સર્જન, બાંધકામના સ્થળો પરથી ઉડતી ધૂળના કણો અને ઔદ્યોગિક પ્રદૂષણ છે.

આરોગ્ય નિષ્ણાતોએ ચેતવણી આપી છે કે જો તાત્કાલિક પગલાં લેવામાં નહીં આવે તો સ્થિતિ વધુ વણસી શકે છે. સરકારે પ્રદૂષણના મુખ્ય સ્ત્રોતોની ઓળખ કરવી જોઈએ અને તેના પર નિયંત્રણ કરવું જોઈએ. વધુમાં, રહેવાસીઓને જાહેર પરિવહનનો ઉપયોગ કરવા માટે પ્રોત્સાહિત કરવા જોઈએ અને વ્યક્તિગત વાહનોની સંખ્યા ઘટાડવા માટે પગલાં લેવા જોઈએ. આવી સ્થિતિમાં, માસ્ક પહેરવું, ઘરની અંદર રહેવું અને એર પ્યુરિફાયરનો ઉપયોગ કરવો જરૂૂરી છે. લાહોરના લોકો અને વહીવટીતંત્રે સાથે મળીને આ સંકટનો સામનો કરવો પડશે જેથી કરીને શહેરની હવાની ગુણવત્તા સુધરી શકે અને રહેવાસીઓના સ્વાસ્થ્યને સુરક્ષિત કરી શકાય.
અહેવાલો અનુસાર, લાહોરની હોસ્પિટલો સૂકી ઉધરસ, શ્વાસ લેવામાં તકલીફ, ન્યુમોનિયા અને છાતીમાં ચેપથી પીડિત દર્દીઓથી ભરેલી છે. મોટાભાગના કેસો સરકારી હોસ્પિટલોમાં નોંધાયા છે.

આમાં મેયો હોસ્પિટલ (4,000 થી વધુ દર્દીઓ), જિન્નાહ હોસ્પિટલ (3,500 દર્દીઓ), ગંગારામ હોસ્પિટલ (3,000 દર્દીઓ) અને ચિલ્ડ્રન્સ હોસ્પિટલ (2,000 થી વધુ દર્દીઓ) નો સમાવેશ થાય છે. પાકિસ્તાનના તબીબી નિષ્ણાત અશરફ ઝિયાએ ચેતવણી આપી છે કે અસ્થમા અને હૃદય રોગથી પીડિત બાળકો અને દર્દીઓ ધુમ્મસના સીધા સંપર્કમાં ન આવે. 10 નવેમ્બરના રોજ પાકિસ્તાનના પંજાબ પ્રદેશના ભાગોમાં હવાની ગુણવત્તા સૂચકાંક 1,900થી ઉપર નોંધાયો હતો. જોકે, 12 નવેમ્બરે હવાની ગુણવત્તા સૂચકાંક 604 માપવામાં આવ્યો હતો, જે ખૂબ જ સંવેદનશીલ છે.

નાસાના મોડરેટ રિઝોલ્યુશન ઇમેજિંગ સ્પેક્ટર રેડિયોમીટરે ઉત્તર પાકિસ્તાનમાં ધુમ્મસની તસવીર શેર કરી છે. નાસાએ કહ્યું કે, નવેમ્બરની શરૂૂઆતમાં ઉત્તર પાકિસ્તાનમાં ધુમ્મસની જાડી ચાદર છવાઈ ગઈ છે. તેના કારણે હવાની ગુણવત્તા બગડી, શાળાઓ બંધ થઈ ગઈ અને સેંકડો લોકોને હોસ્પિટલમાં દાખલ થવું પડ્યું. પાકિસ્તાન સ્મોગ સંકટને પહોંચી વળવા માટે તમામ શક્ય પ્રયાસો કરી રહ્યું છે. લગ્નો પર 3 મહિનાનો પ્રતિબંધ લાદવામાં આવ્યો છે.