બિહારમાં વધુ એક પુલે લીધી ગંગામાં જળસમાધિ, 1710 કરોડના ખર્ચે નિર્માણાધીન બ્રિજનો પિલ્લર ધરાશાયી, જુઓ વિડીયો
બિહારમાં વધુ એક પુલ ધરાશયી થવાની ઘટના સામે આવી છે. ભાગલપુરમાં સુલતાનગંજ-અગુવાની ગંગા નદી પર નિર્માણાધીન ફોર-લેન પુલ ત્રીજી વખત ઘરાશાયી થયો હતો. જ્યાં બ્રિજના 9 નંબરના પિલ્લરનો સ્ટ્રક્ચર ફરી એકવાર ધ્વસ્ત થઈ ગયો. ઘટનાસ્થળે હાજર લોકોએ કહ્યું કે આ ઘટના શનિવારે સવારે બની હતી. એસપી સિંગલા કંપની આ પુલનું નિર્માણ કરી રહી છે. આ બ્રિજ ખગરિયા અને ભાગલપુર જિલ્લાને જોડવા માટે ભાગલપુર જિલ્લાના સુલતાનગંજમાં બનાવવામાં આવી રહ્યો છે.
ઘટનાસ્થળે હાજર લોકોએ દાવો કર્યો હતો કે ગંગા નદીમાં આવેલા પૂર અને તેજ વહેણને લીધે 9 નંબરના પિલ્લર પર તૈયાર સુપર સ્ટ્રક્ચરનો અમુક ભાગ બચી ગયો હતો જે અચાનક ધસીને પાણીમાં સમાઈ ગયો. જેવો જ આ સ્ટ્રક્ચર ધરાશાયી થઇ પાણીમાં પડ્યો કે તરત જ એવો ધડાકા જેવો અવાજ આવ્યો કે આજુબાજુના રહેવાશીઓ ગભરાઈ ગયા હતા.
આ અગાઉ પણ 4 જૂન, 2023ના રોજ સુલતાનગંજ-અગુવાની ગંગા નદી પર નિર્માણાધીન ચાર માર્ગીય પુલ જમીનદોસ્ત થઈ ગયો હતો. નિર્માણાધીન બ્રિજનું સુપર સ્ટ્રક્ચર નદીમાં પડી ગયું હતું. આ સાથે જ બ્રિજ પર ફરજ બજાવતા બે ગાર્ડ પણ અકસ્માત બાદ ગુમ થઈ ગયા હતા. તે સમયે અગુઆની બાજુના બ્રિજના પિયર નંબર 10, 11, 12 ઉપરનું આખું સુપર સ્ટ્રક્ચર ધરાશાયી થયું હતું, જે લગભગ 200 મીટર જેટલો ભાગ હશે.
તે પહેલા 27 એપ્રિલ 2022ના રોજ આ નિર્માણાધીન પુલનું સુપર સ્ટ્રક્ચર નદીમાં પડી ગયું હતું. જોરદાર તોફાન અને વરસાદના કારણે લગભગ 100 ફૂટ લાંબો ભાગ નદીમાં પડી ગયો હતો. જો કે તે સમયે કોઈ જાનહાની કે જાનહાનિ થઈ ન હતી. આ પછી પુલ બનાવવાનું કામ ફરી શરૂ થયું. આ વખતે સુપર સ્ટ્રક્ચરનું લગભગ 80 ટકા કામ પૂર્ણ થયું છે. એટલું જ નહીં, એપ્રોચ રોડનું 45 ટકા કામ પણ પૂર્ણ થઈ ગયું છે.
તમને જણાવી દઈએ કે ભાગલપુર-સુલતાનગંજ અગુઆની બ્રિજ ઉત્તર અને દક્ષિણ બિહારને જોડતો બિહાર સરકારનો મહત્વાકાંક્ષી પ્રોજેક્ટ છે. આ પ્રોજેક્ટનું પ્રારંભિક મૂલ્ય 1710.77 કરોડ રૂપિયા હતું. મુખ્યમંત્રી નીતિશ કુમારે 23 ફેબ્રુઆરી 2014ના રોજ તેનો શિલાન્યાસ કર્યો હતો.
