ઉત્તર પ્રદેશમાં ભયાનક માર્ગ અકસ્માત, બેકાબૂ ટ્રકે ટ્રેક્ટરને ફંગોળી નાખતાં 10 મજૂરોના મોત
ઉત્તર પ્રદેશના મિર્ઝાપુરમાં એક ભયાનક માર્ગ અકસ્માતની ઘટના સામે આવી છે. વારાણસી-પ્રયાગરાજ રાષ્ટ્રીય ધોરીમાર્ગ પર કચવાણ પોલીસ સ્ટેશન વિસ્તારના કટકા ગામ પાસે એક ટ્રેક્ટરને એક બેકાબૂ ટ્રકે પાછળથી ફંગોળી નાખતાં 10 લોકોના મોત થયા છે. ત્રણ મજૂરો ગંભીર રીતે ઘાયલ થયા હતા. દરેકને વારાણસી ટ્રોમા સેન્ટરમાં રીફર કરવામાં આવ્યા છે.
ભદોહીના મજૂરો ટ્રેક્ટર ટ્રોલીમાં વારાણસીના રામસિંહપુર મિર્ઝામુરાદમાં તેમના ઘરે જઈ રહ્યા હતા, તે દરમિયાન આ અકસ્માત થયો. અકસ્માતની માહિતી મળતા જ પોલીસની ટીમ ત્યાં પહોંચી ગઈ હતી અને ઘટનાની તપાસ હાથ ધરી હતી. એક પોલીસ અધિકારીએ જણાવ્યું કે ઘાયલોને હોસ્પિટલમાં મોકલવામાં આવ્યા છે.
અકસ્માતમાં જીવ ગુમાવનારા તમામ મજૂરો વારાણસીના રહેવાસી છે. મૃતકોના નામમાં ભાનુ પ્રતાપ, વિકાસ કુમાર, અનિલ કુમાર, સૂરજ કુમાર, સનોહર, રાકેશ કુમાર, પ્રેમ કુમાર, રાહુલ કુમાર, નીતિન કુમાર અને રોશન કુમારનો સમાવેશ થાય છે. દરમિયાન ઘાયલોમાં આકાશ કુમાર, જામુની અને અજય સરોજનો સમાવેશ થાય છે. આ તમામ લોકો બિરબલપુર મિરઝામુરાદ અને રામસિંહપુર મિરઝામુદાર ગામના રહેવાસી હતા. આ અકસ્માત ગુરુવારે રાત્રે લગભગ 1 વાગ્યાની આસપાસ થયો હતો.
પોલીસ અધિક્ષક અભિનંદને જણાવ્યું કે ટ્રકે ટ્રેક્ટર ટ્રોલીને પાછળથી ટક્કર મારી હતી. આ અકસ્માતમાં 10 મજૂરોના મોત થયા હતા. ત્રણ ઘાયલ છે, જેમને વારાણસી ટ્રોમા સેન્ટરમાં મોકલવામાં આવ્યા છે. મજૂરો કામ માટે ભદોહીથી વારાણસી જઈ રહ્યા હતા. ટ્રક ચાલક સ્થળ પરથી ફરાર થઈ ગયો છે. મૃતદેહનો કબજો લઈ પોસ્ટમોર્ટમ માટે મોકલી આપવામાં આવ્યો છે.
અકસ્માતને પગલે ઘટનાસ્થળે અફરા-તફરીનો માહોલ સર્જાયો હતો. સ્થળ પર લોકોનું ટોળું એકઠું થયું હતું. અકસ્માતમાં ટ્રેક્ટરને ભારે નુકસાન થયું હતું. તે જ સમયે, ટ્રકના આગળના ભાગને નુકસાન થયું છે. પોલીસે રસ્તા પરથી વાહનો હટાવવા માટે જેસીબી મંગાવ્યું છે. એક પોલીસ અધિકારીએ જણાવ્યું કે મૃતકોના પરિવારજનોને માહિતી મોકલી દેવામાં આવી છે.
