TATA ઇલેક્ટ્રોનિક્સ પ્લાન્ટમાં લાગી ભીષણ આગ, દૂર દૂર સુધી ધુમાડાના ગોટેગોટા ઉડ્યા, જુઓ VIDEO

તામિલનાડુના હોસુરમાં ટાટા ઈલેક્ટ્રોનિક્સના પ્લાન્ટમાં આજે ભીષણ આગ લાગી હતી. સેલફોન ઉત્પાદન વિભાગમાં આગ ફાટી નીકળી હતી, જેના પગલે કર્મચારીઓએ જગ્યા ખાલી કરવી પડી હતી. સમાચાર એજન્સી પીટીઆઈના જણાવ્યા અનુસાર આગને કારણે ઘણું નુકસાન થયું છે. ફાયર બ્રિગેડ આગ પર કાબૂ મેળવવા કામે લાગી છે.

ટાટા ઇલેક્ટ્રોનિક્સ પ્લાન્ટમાં ભીષણ આગ લાગતાં કંપનીનો સામાન બળીને રાખ થઈ ગયો હતો. આગનો એક વીડિયો પણ સામે આવ્યો છે, જેમાં ધુમાડાના ગોટેગોટા જોઈ શકાય છે. આગ લાગ્યા બાદ શરુઆતમાં કર્મચારીઓએ ફેક્ટરીમાં હાજર ફાયર એન્જિન સાથે આગ ઓલવવાનો પ્રયાસ કર્યો હતો. જ્યારે આગ પર કાબૂ મેળવી શકાયો ન હતો, ત્યારે રાયકોટ્ટાઈ અને ઢેંકનીકોટ્ટાઈ વિસ્તારમાંથી ફાયર વિભાગને બોલાવવામાં આવ્યા હતા. ફાયર વિભાગની ગાડીઓ હજુ પણ આગ ઓલવવાનો પ્રયાસ કરી રહી છે.

જ્યારે ફેક્ટરીમાં આગ લાગી ત્યારે લગભગ 1,500 કામદારો ફરજ પર હતા. આગ લાગવાનું કારણ હજુ સુધી જાણી શકાયું નથી. પોલીસ અધિકારીઓએ જણાવ્યું હતું કે શ્વાસની સમસ્યાથી પીડાતા ત્રણ કર્મચારીઓને ખાનગી હોસ્પિટલમાં લઈ જવામાં આવ્યા હતા, જ્યાં તેમની સ્થિતિ સ્થિર છે.ઘટના સ્થળે 100થી વધુ પોલીસકર્મીઓની ટીમ તૈનાત કરવામાં આવી છે. ઘણા iPhone ઉત્પાદનો અહીં ઉત્પન્ન થાય છે.