આસ્થાનો અતિરેક: મહાકુંભમાં ધક્કામુક્કીમાં 17નાં મોત

મૌની અમાવસ્યાના અમૃત સ્નાન માટે કરોડો શ્રધ્ધાળુઓ ઊમટી પડતાં સંગમ ઘાટ ઉપર ભારે અવ્યવસ્થા ફેલાઇ

વહીવટી તંત્ર દ્વારા યુધ્ધના ધોરણે બચાવ-રાહત કાર્ય, પ્રયાગરાજમાં પ્રવેશતા વાહનો-ટ્રેનો રોકી દેવાયા, 20 કિ.મી. સુધી ટ્રાફિકજામ

અનેક લોકો ભીડમાં વિખુટા પડી ગયા, લોકોને અફવાઓથી દૂર રહેવા અને ધીરજ રાખવા મુખ્યમંત્રી યોગીની અપીલ

અચાનક બેરીકેટ તૂટયું, બચવાની કોઇ જગ્યા ન હતી, ચારેબાજુથી ભીડની ધક્કા મુક્કીમાં લોકો ફસાયા, આંખે દેખ્યો અહેવાલ

દેશની ધાર્મીક નગરી પ્રયાગરાજમાં ચાલી રહેલા મહાકુંભમાં આજે મૌની અમાવસ્યાના અમૃતસ્નાન દરમિયાન વહેલી પરોઢીયે ધકામુકી અને નાસભાગ થતા 17 જેટલા શ્રધ્ધાળુઓના દબાઇ જવાથી કરૂણ મોત નિપજયા હતા. જયારે અનેક શ્રધ્ધાળુઓ ઘાયલ થતા ભારે અફરા-તફરી મચી જવા પામી હતી. જો કે, પ્રશાસન દ્વાા સમયસર બચાવ- રાહત કાર્ય શરૂ કરાતા અને પ્રયાગરાજમાં ભાવિકોની એન્ટ્રી બંધ કરી દેવામાં આવતા કલાકોમાં જ સ્થિતિ ઉપર કાબુ મેળવી લેવાયો હતો.

આજે મૌની અમાવસ્યાના અમૃત સ્નાનનું ધાર્મિક મહત્વ હોવાથી કરોડો શ્રધ્ધાળુઓ ઉટી પડતા હતા અને પ્રયાગરાજમાં ગંગા ઘાટથી 20 કીમી સુધી ટ્રાફીક જામસર્જાયો હતો. વહેલી પરોઢીયે રાત્રે 1-30 થી 2-30 વાગ્યા વચ્ચે સંગમ ઘાટ પર અચાનક ભીડ વધી જતા ધક્કામુકી અને નાસભાગ મચી જતા અને લોકો ગબડી પડયા હતા અને તેની પરથી ભીડ ફરી વળતા લગભગ 17 લોકોના મોત નિપજયા હતા.

આ દુર્ઘટનાના પગલે પ્રશાસને તાબડતોબ બચાવ-રાહત કામ શરૂ કર્યું હતું એ પ્રયાગરાજમાં લોકોની એન્ટ્રી બંધ કરી દેતા તેમજ ભીડને જયાન હોય ત્યાં જ અટકાવી દેતા સ્થિતિ કાબુમાં આવી હતી. ઘટનાના પગલે પ્રયાગરાજ આવતી ટ્રેનો અને વાહનો જયાં છે ત્યાં જ અટકાવી દેવાયા છે. જયારે થોડા કલાકો માટે સ્નાન પણ અટકાવી દેવાયું હતું.
આ ઘટનાના પગલે યુપીના મુખ્યમંત્રી યોગી સાથે વડાપ્રધાન મોદી, ગૃહમંત્રી અમિત શાહ, આરોગ્યમંત્રી જે.પી. નડ્ડાએ સતત વાતચીત કરી સ્થિતિનો તાગ મેળવ્યો હતો. યુપીના મુખ્યમંત્રી યોગીએ પણ લોકોને ધકકામુકી નહીં કરવા, અફવાઓથી દુર રહેવા અને ગંગામાં ગમે ત્યાં સ્નાન કરી લેવા તથા ધીરજ રાખવા અપીલ કરી છે.
તેમણે જણાવ્યું હતું કે આજે સવારે 6 વાગ્યા સુધીમાં જ 3.25 કરોડ લોકોએ સ્નાન કર્યું હતું અને પ્રયાગરાજની ચોતરફ ભારે ભીડનું દબાણ છે તેમને નિયંત્રીત કરવામાં આવી રહી છે. આજે એક જ દિવસમાં દસેક કરોડ લોકો ઉમટી પડયાનો અંદાજ છે.

ગંગા કિનારે સંગમ ઘાટ ઉપર મૌની અમાવસ્યાના સ્નાન પહેલા મહાકુંભમાં નાસભાગ મચી ગઈ હતી. સેંકડો લોકો એકબીજા ઉપર ચઢી ગયા. જેના કારણે 17 લોકોના મોત પણ થયા છે. જોકે, વહીવટીતંત્રે હજુ સુધી કોઈના મોતની પુષ્ટિ કરી નથી. 20 થી વધુ એમ્બ્યુલન્સે લોકોને સ્થળ પર હોસ્પિટલ મોકલ્યા છે. 20 જેટલા લોકોને મહાકુંભ હોસ્પિટલમાં લાવવામાં આવ્યા છે. જિલ્લાની તમામ હોસ્પિટલોને એલર્ટ કરી દેવામાં આવી છે. ઘાયલોને બેઈલી સહિત અન્ય હોસ્પિટલમાં લઈ જવામાં આવી રહ્યા છે. કર્ણાટકના બેલગામથી આવેલી સરોજિની નામની મહિલાએ જણાવ્યું કે સંગમ નાકા પર અચાનક ભીડ વધી ગઈ અને પિલર તૂટીને પડી જતાં નાસભાગ મચી ગઈ.

સંગમ કાંઠે અને તેની આસપાસ લાખો ભક્તો એકઠા થયા હતા. કેટલાક ન્હાવાવાળાઓએ અખાડાઓ માટે બનાવેલા બેરિકેડ્સને તોડવાનો પણ પ્રયાસ કર્યો હતો. તેને જ્યાં જગ્યા મળે ત્યાં જતો. આ દરમિયાન સ્થિતિ વણસવા લાગી. રાત્રે 2 વાગ્યાની આસપાસ પરિસ્થિતિ કાબૂ બહાર જતાં નાસભાગ મચી ગઈ હતી. દોડતી ભીડમાં જે નીચે પડી ગયો તે ઊઠી શક્યો નહીં.

નાસભાગ બાદ પોતાના પ્રિયજનોથી વિખૂટા પડી ગયેલા ઘણા લોકો હોસ્પિટલ પહોંચ્યા છે. જો કે હજુ સુધી કોઈને અંદર જવા દેવામાં આવ્યા નથી. હોસ્પિટલ પહોંચેલા લોકોએ જણાવ્યું કે ઘણા લોકો દટાયેલા છે. તેમને ઉપાડવા કે બચાવવા માટે કોઈ નહોતું. લોકો માત્ર કચડી રહ્યા હતા. ઘટનાસ્થળે અનેક લોકોનો સામાન પણ વેરવિખેર પડ્યો છે. ઘણા લોકો તેમના પ્રિયજનોથી અલગ થઈ ગયા છે. પોલીસ પ્રશાસને અલગ થયેલા લોકોને તેમના ઘરે જવાની અપીલ કરી છે.

સંગમ સુધી ન આવવા યોગીની અપીલ, વડાપ્રધાને ચાર વખત ફોન કરી માહિતી મેળવી
પ્રયાગરાજમા મહાકુંભમા આજે મૌની અમાવસ્યાના સ્નાન પહેલા રાત્રે થયેલી ભાગદોડ કારણે પરીસ્થિતી હવે કાબૂમાં છે. ઉતર પ્રદેશના મુખ્યપ્રધાન યોગી આદિત્યનાથે આજે સવારે હાઇલેવલની બેઠક બોલાવી હતી. તેમણે સમગ્ર પરિસ્થિતી અને વ્યવસ્થાની સમીક્ષા કરી હતી. તેમણે મીડિયાને જણાવ્યું હતું કે વડાપ્રધાન નરેન્દ્ર મોદી સતત પરિસ્થિતીનો તાગ મેળવી રહયા છે અને આવશ્યક માર્ગદર્શન આપી રહયા છે. તેમણે સવારથી 4 વખત ફોન કરીને માહીતી મેળવી છે. આ ઉપરાંત ભાજપાના રાષ્ટ્રીય અધ્યક્ષ જે. પી. નડ્ડા, ગૃહમંત્રી અમિત શાહ, રાજયપાલ આનંદી પટેલે પણ લગાતાર માહિતી મેળવી રહયા છે.

ગંગામાં ગમે ત્યાં સ્નાન કરો, અખાડા પરિષદની અપીલ
મહાકુંભમાં નાસભાગ બાદ અખાડા પરિષદે ભક્તોને અપીલ કરી છે કે તેઓ ગમે ત્યાં ગંગામાં સ્નાન કરે તો તેમને અમાવસ્યાનું પુણ્ય મળશે. અખિલ ભારતીય અખાડા પરિષદના મહામંત્રી અને જુના અખાડાના સંરક્ષક મહંત શ્રી હરિ ગિરી મહારાજે ભક્તોને અપીલ કરી છે અને કહ્યું છે કે જો તેઓ આજે મૌની અમાવસ્યા નિમિત્તે ગમે ત્યાં ગંગા સ્નાન કરે તો તેમને સંપૂર્ણ પુણ્ય મળશે. તેમણે કહ્યું કે તમામ ભક્તોએ ગમે ત્યાં ગંગામાં જઈને ભગવાનમાં શ્રદ્ધા રાખીને સ્નાન કરવું જોઈએ અને પુણ્યનો લાભ લેવો જોઈએ. તમે જ્યાં પણ ગંગાના કિનારે સ્નાન કરો છો, પછી ભલે તે પ્રયાગરાજની સીમામાં હોય કે અન્ય કોઈ શહેરની સીમાની બહાર હોય, કાશીની અથવા સમગ્ર ભારતમાં ક્યાંય પણ, તમે ગંગામાં સ્નાન કરો છો, તો તમને તેનો લાભ મળશે. સંપૂર્ણ પુણ્ય અને નવો ચંદ્ર. તેમણે ભક્તોને ત્યાં સ્નાન કરીને લાભ લેવા અને પછી પોતાના ઘર તરફ જવાની અપીલ કરી છે.

ઘણી મહાકુંભ સ્પેશિયલ ટ્રેનો ડાઇવર્ટ

પ્રયાગરાજમાં મહાકુંભમાં મૌની અમાસના શાહી સ્નાન વખતે ભારે ભીડને ધ્યાનમાં રાખીને, પંડિત દીનદયાળ ઉપાધ્યાય જંકશનથી પ્રયાગરાજ જતી મહા કુંભ મેળાની વિશેષ ટ્રેનોનું સંચાલન બંધ કરી દેવામાં આવ્યું છે. જેના કારણે જંકશન પર પ્રયાગરાજ જતા ભક્તોની ભીડ જોવા મળે છે. વિવિધ રૂૂટ પર દોડતી કુંભ મેળાની ખાસ ટ્રેનોનું સંચાલન રાબેતા મુજબ ચાલુ છે. પંડિત દીનદયાળ ઉપાધ્યાય જંકશનથી પ્રયાગરાજ આવતી કુંભ મેળાની ખાસ ટ્રેનોને જ રોકવામાં આવી છે. પરંતુ નિયમિત ટ્રેનો દોડી રહી છે. પંડિત દીનદયાળ ઉપાધ્યાય જંકશનથી પ્રયાગરાજ જતી કુંભ મેળાની ખાસ ટ્રેનોને જ રોકવામાં આવી છે. પંડિત દીનદયાળ ઉપાધ્યાય રેલવે ડિવિઝનના વાણિજ્યિક મેનેજર મનીષ કુમારે જણાવ્યું હતું કે, પઆગામી આદેશો સુધી સ્પેશિયલ ટ્રેનનું સંચાલન બંધ કરવામાં આવ્યું છે. કુંભ મેળાની ખાસ ટ્રેનો હાલ પૂરતી બંધ રહેશે. નિયમિત ટ્રેનો દોડતી રહેશે. પ્રયાગરાજમાં ભારે ભીડને કારણે, ખાસ ટ્રેનને રોકવામાં આવી છે.