દિલ્હી ધુમ્મસમાં 'ગાયબ' થયું: વિઝિબલિટી ઝીરો થઈ, યુપી-બિહારમાં વરસાદનું એલર્ટ

દિલ્હી સહિત ઉત્તર ભારતના મોટાભાગના રાજ્યો હાલમાં કડકડતી ઠંડીની લપેટમાં છે. દિલ્હીથી લઈને ઉત્તર પ્રદેશ, બિહાર અને રાજસ્થાન સુધી ધુમ્મસના કારણે લોકોની પરેશાની વધી રહી છે. હવામાન વિભાગના જણાવ્યા અનુસાર, 11 અને 12 જાન્યુઆરીએ ઘણા રાજ્યોમાં વરસાદની સંભાવના છે, જેના કારણે તાપમાનમાં વધુ ઘટાડો થઈ શકે છે. રાષ્ટ્રીય રાજધાનીમાં આજે સવારે ગાઢ ધુમ્મસ છે, જેના કારણે વિઝિબિલિટી શૂન્ય થઈ ગઈ છે. ધુમ્મસને જોતા વિભાગે આજે દિલ્હીમાં યલો એલર્ટ જાહેર કર્યું છે.

વિભાગના ડેટા અનુસાર, 10 જાન્યુઆરીએ એટલે આજે દિલ્હીમાં મહત્તમ તાપમાન 20 ડિગ્રી સેલ્સિયસ અને લઘુત્તમ તાપમાન 6 ડિગ્રી સેલ્સિયસ રહેવાની ધારણા છે. 11 જાન્યુઆરીએ હળવો વરસાદ અને ભારે પવન ફૂંકાશે. જેના કારણે મહત્તમ તાપમાન ઘટીને 17 ડિગ્રી અને લઘુત્તમ તાપમાન 9 ડિગ્રી સુધી રહી શકે છે. છેલ્લા ઘણા દિવસોથી રાષ્ટ્રીય રાજધાનીમાં ઠંડા પવનો પછી, ગુરુવારે બપોરે સૂર્યપ્રકાશ હતો અને મહત્તમ તાપમાન 21.2 ડિગ્રી સેલ્સિયસ નોંધાયું હતું, જે સામાન્ય કરતાં 2.2 ડિગ્રી વધારે છે અને દિલ્હીમાં દિવસ દરમિયાન આકાશ સ્વચ્છ રહ્યું હતું સવારે હળવા ધુમ્મસ છાયા હતા.

યુપીમાં પણ ભારે ઠંડી પડી રહી છે. હવામાન વિભાગના જણાવ્યા અનુસાર આગામી 24 કલાકમાં રાજ્યના હવામાનમાં ફરી એકવાર પલટો આવવાની સંભાવના છે. રાજ્યના ઘણા ભાગોમાં 11 અને 12 જાન્યુઆરીએ વાદળછાયું વાતાવરણ રહેશે અને ઝરમર વરસાદ પડી શકે છે. આ અંગે હવામાન વિભાગે એલર્ટ પણ જાહેર કર્યું છે. વરસાદને કારણે તાપમાનમાં થોડો ઘટાડો થશે. ઠંડા પશ્ચિમી પવનોને કારણે બિહારમાં કોલ્ડ વેવની સ્થિતિ પ્રવર્તી રહી છે. હવામાન વિભાગે આગામી એક સપ્તાહ સુધી સ્થિતિમાં કોઈ ખાસ ફેરફારની આગાહી કરી નથી.

કાશ્મીરમાં મોટા ભાગના સ્થળોએ લઘુત્તમ તાપમાન ફ્રીઝિંગ પોઈન્ટથી અનેક ડિગ્રી નીચે પહોંચી ગયું છે અને ખીણમાં ઠંડી ચાલુ છે. હવામાન વિભાગે કહ્યું કે છેલ્લા કેટલાક દિવસોથી આકાશ સ્વચ્છ છે અને તેજસ્વી સૂર્યપ્રકાશ જોવા મળી રહ્યો છે, પરંતુ ઘાટીના મોટાભાગના વિસ્તારોમાં રાત્રિના તાપમાનમાં ઘટાડો થયો છે. ઉત્તર કાશ્મીરના ગુલમર્ગને છોડીને સમગ્ર ખીણમાં લઘુત્તમ તાપમાનમાં અનેક ડિગ્રીનો ઘટાડો થયો છે, જેના કારણે કાશ્મીરમાં ઠંડી વધી ગઈ છે. વિભાગના જણાવ્યા અનુસાર, આગામી બે દિવસ દરમિયાન શિમલા અને હિમાચલ પ્રદેશના ઊંચાઈ અને મધ્યમ ઊંચાઈના પહાડી વિસ્તારોમાં હિમવર્ષા થવાની આગાહી કરવામાં આવી છે.

પંજાબ અને હરિયાણામાં 9 જાન્યુઆરીએ ઠંડીનું વાતાવરણ ચાલુ રહ્યું હતું અને મોગામાં લઘુત્તમ લઘુત્તમ તાપમાન 2.3 ડિગ્રી સેલ્સિયસ નોંધાયું હતું. સવારે બંને રાજ્યોના કેટલાક વિસ્તારોમાં ગાઢ ધુમ્મસ છવાયું હતું. વિભાગના જણાવ્યા અનુસાર, આંદામાન અને નિકોબાર ટાપુઓમાં હળવાથી મધ્યમ વરસાદની સાથે કેટલીક જગ્યાએ ભારે વરસાદ થઈ શકે છે. રાજસ્થાનના ઘણા વિસ્તારોમાં ભારે ઠંડી છે અને હવામાન વિભાગે આગામી બે દિવસમાં ઘણી જગ્યાએ વરસાદની આગાહી કરી છે.