'ડેથ ચેમ્બર બની ગયા છે કોચિંગ સેન્ટરો… ', સુપ્રીમ કોર્ટે ફેડરેશને ફટકાર્યો 1 લાખનો દંડ

કોચિંગ સેન્ટરોમાં રહેલા જોખમો અને અવારનવાર થતા અકસ્માતોને ધ્યાનમાં રાખીને સુપ્રીમ કોર્ટે સુઓ મોટુ સંજ્ઞાન લીધું છે અને સલામતી માટે માર્ગદર્શિકા બનાવવાનો મોટો આદેશ આપ્યો છે. કોર્ટે દિલ્હીના કોચિંગ સેન્ટરોને ડેથ ચેમ્બર ગણાવ્યા છે. કોર્ટે અરજીકર્તા કોચિંગ સેન્ટર ફેડરેશન પર 1 લાખ રૂપિયાનો દંડ પણ ફટકાર્યો છે.

દિલ્હીના રાજીન્દર નગરમાં કોચિંગ સેન્ટરમાં UPSC વિદ્યાર્થીઓના મોત બાદ સુપ્રીમ કોર્ટે સુઓ મોટુ સંજ્ઞાન લીધું છે અને દિલ્હીના કોચિંગ સેન્ટરોની સુરક્ષા અંગે ભારત સરકાર અને દિલ્હી સરકારને નોટિસ પાઠવી છે. સુપ્રીમ કોર્ટે સુનાવણી દરમિયાન કહ્યું કે કોચિંગ સેન્ટર્સ બાળકોના જીવન સાથે રમત રમી રહ્યા છે. કોચિંગ સેન્ટરો ડેથ ચેમ્બર બની ગયા છે.

સુપ્રીમ કોર્ટે કેન્દ્ર સરકાર અને દિલ્હીના મુખ્ય સચિવને નોટિસ પાઠવીને પૂછ્યું છે કે શું કોચિંગ સેન્ટરોમાં સલામતીના નિયમો લાગુ કરવામાં આવ્યા છે. સુપ્રીમ કોર્ટે એટર્ની જનરલને આ મામલે કોર્ટની મદદ કરવા કહ્યું છે. કોર્ટે કહ્યું કે અમારું માનવું છે કે જો કોચિંગ સેન્ટર્સ સુરક્ષાના ધોરણોને પૂર્ણ કરતા નથી તો તેને ઓનલાઈન મોડમાં બનાવવું જોઈએ. પરંતુ અત્યારે અમે આ નથી કરી રહ્યા.

દિલ્હી હાઈકોર્ટના આદેશને પડકારવા પર સુપ્રીમ કોર્ટે કોચિંગ સેન્ટર ફેડરેશનના પ્રમુખ, સેક્રેટરી અને ટ્રેઝરર પર 1 લાખ રૂપિયાનો દંડ ફટકાર્યો છે. મુખર્જી નગર કોચિંગ અકસ્માત બાદ દિલ્હી હાઈકોર્ટે એવા કોચિંગ સેન્ટરોને બંધ કરવાનો આદેશ આપ્યો હતો જેની પાસે ફાયર એનઓસી નથી. હાઈકોર્ટના આદેશને કોચિંગ ફેડરેશન ઓફ ઈન્ડિયા દ્વારા સુપ્રીમ કોર્ટમાં પડકારવામાં આવ્યો હતો.