અંબાણી મીડિયા માંધાતા બનવા તરફ, 100થી વધુ ચેનલો હસ્તગત કરશે

દેશના મોટા ઉદ્યોગપતિ મુકેશ અંબાણી ભારતીય મીડિયા ઈન્ડસ્ટ્રીનું સૌથી મોટું નામ બનવા જઈ રહ્યા છે. એકવાર સોદો પૂર્ણ થઈ ગયા પછી, અંબાણીના હાથમાં 100 થી વધુ ચેનલો અને 2 સ્ટ્રીમિંગ પ્લેટફોર્મ હશે. મીડિયા રિપોર્ટ્સ અનુસાર, મુકેશ અંબાણીની રિલાયન્સ અને વોલ્ટ ડિઝનીના મર્જરને અંતિમ માનવામાં આવે છે. બંને કંપનીઓ વચ્ચે વાતચીત એડવાન્સ લેવલ પર પહોંચી ગઈ છે.

Star India અને Viacom18 ના મર્જરમાં 100થી વધુ ચેનલો અને 2 સ્ટ્રીમિંગ પ્લેટફોર્મનો સમાવેશ થાય છે. જો આ મર્જર સફળ રહેશે તો તે મીડિયા ઈન્ડસ્ટ્રીનું સૌથી મોટું મર્જર હશે. Star -Viacom18 મર્જર યુનિટમાં રિલાયન્સનો કુલ હિસ્સો 51 ટકાથી વધી શકે છે. બીજી તરફ વોલ્ટ ડિઝનીનો હિસ્સો 40 ટકા રહેશે. ઉદય શંકર અને જેમ્સ મર્ડોકની બોધિ ટ્રી સિસ્ટમ્સ બંને મર્જ થયેલી એન્ટિટીમાં 7-9 ટકા હિસ્સો ધરાવે છે.

માહિતી અનુસાર, રિલાયન્સ મર્જરમાં વધારાની મૂડીનું રોકાણ કરી શકે છે જેથી નવી કંપનીને સીધી સબસિડિયરી કંપની તરીકે તૈયાર કરી શકાય. Star અને Viacom18એ ગયા વર્ષે 31 માર્ચ, 2023 ના રોજ પૂરા થતા નાણાકીય વર્ષમાં રૂ. 25,000 કરોડથી વધુની સંયુક્ત આવક ઊભી કરી હતી.

ટીવી અને ડિજિટલ પ્રોપર્ટી ઉપરાંત, સંયુક્ત એન્ટિટી પાસે ઈન્ડિયન સુપર લીગ અને પ્રો કબડ્ડી લીગના અધિકારો હશે. આ બાબતથી સંબંધિત એક ટોચના અધિકારીએ જણાવ્યું હતું કે ક્રિકેટના અધિકારોથી થતા નુકસાન અને ડિઝની હોટસ્ટારના ગ્રાહક આધારમાં થયેલા મોટા ઘટાડાને સમાયોજિત કરીને, રિલાયન્સે સ્ટાર ઇન્ડિયાનું કુલ મૂલ્ય 4 બિલિયન આંક્યું છે, જેના કારણે સંયુક્ત એકમ મૂલ્યાંકન 8 બિલિયન થયું છે.

વાસ્તવમાં શુક્રવારે રિલાયન્સ ઇન્ડસ્ટ્રીઝના શેરમાં વધારો જોવા મળ્યો હતો. કંપનીના શેરમાં 3 ટકાથી વધુનો ઉછાળો આવ્યો હતો. શેરબજાર બંધ થયા બાદ કંપનીનો શેર 2.18 ટકા એટલે કે રૂ. 62.05ના ઉછાળા બાદ રૂ.2914.75 પર બંધ થયો હતો. કંપનીના શેર 2,949.90 રૂપિયાના લાઇફ ટાઇમ પર પહોંચી ગયા હતા. સોમવારે કંપનીના કુલ શેર 3000 રૂપિયાના સ્તરને પણ પાર કરી શકે છે. કંપનીનું માર્કેટ કેપ રૂ. 20 લાખ કરોડને પાર કરી શકે છે, જેમાં રૂ. 28 હજાર કરોડનું ગેપ બાકી છે.