PAN બાદ હવે ચુંટણી કાર્ડ પણ આધાર કાર્ડ સાથે લિંક થશે, ચૂંટણી પંચે લીધો મહત્વનો નિર્ણય

વોટર આઈડી કાર્ડને આધાર કાર્ડ સાથે લિંક કરવાની ઝુંબેશ આગામી મહિનાઓમાં વધુ તેજ કરવામાં આવશે. આજે યોજાયેલી એક મહત્વપૂર્ણ બેઠકમાં દેશના ચૂંટણી પંચે આ બંનેને જોડવાની મંજૂરી આપી દીધી છે. આ સંદર્ભમાં, ચૂંટણી પંચે એક નિવેદન જારી કરીને કહ્યું છે કે બંધારણની કલમ 326 અને લોક પ્રતિનિધિત્વ કાયદાની કલમ 23(4), 23(5) અને 23(6) મુજબ EPIC ને આધાર સાથે લિંક કરવામાં આવશે. અગાઉ સરકારે પાન કાર્ડને આધાર સાથે લિંક કરવાનો નિર્ણય લીધો હતો.

નિવેદનમાં કહેવામાં આવ્યું છે કે ચૂંટણી પંચ 1950ના લોકોના પ્રતિનિધિત્વ અધિનિયમની કલમ 326 અને સુપ્રીમ કોર્ટના સંબંધિત નિર્ણયો અનુસાર EPIC ને આધાર સાથે લિંક કરવા માટે પગલાં લેશે. આજે, CEC જ્ઞાનેશ કુમારના નેતૃત્વ હેઠળ, ડૉ. સુખબીર સિંહ સંધુ અને ડૉ. વિવેક જોશી સાથે EC એ કેન્દ્રીય ગૃહ સચિવ- લેજિસ્લેટિવ વિભાગના સચિવ, MeitYના સચિવ અને UIDAIના CEO અને ECIના ટેકનિકલ નિષ્ણાતો સાથે નિર્વચન સદન ખાતે બેઠક યોજી હતી.

ભારતના બંધારણના અનુચ્છેદ 326 મુજબ, મત આપવાનો અધિકાર ફક્ત ભારતના નાગરિકને જ આપી શકાય છે, આધાર કાર્ડ ફક્ત વ્યક્તિની ઓળખ સ્થાપિત કરે છે. તેથી, એવું નક્કી કરવામાં આવ્યું હતું કે EPIC ને આધાર સાથે લિંક કરવાનું કાર્ય બંધારણની કલમ 326, લોક પ્રતિનિધિત્વ અધિનિયમ, 1950 ની કલમ 23(4), 23(5) અને 23(6) ની જોગવાઈઓ અનુસાર અને સુપ્રીમ કોર્ટના ક્રમાંક 2/2073માં સુપ્રીમ કોર્ટના નિર્ણય અનુસાર કરવામાં આવશે. હવે UIDAI અને ECIના ટેકનિકલ નિષ્ણાતો વચ્ચે ટેકનિકલ પરામર્શ ટૂંક સમયમાં શરૂ કરવામાં આવશે.

ચૂંટણી પંચે તાજેતરમાં જ નિર્ણય લીધો હતો કે તે આગામી ત્રણ મહિનામાં ડુપ્લિકેટ નંબર ધરાવતા મતદાર IDને નવા EPIC નંબરો જારી કરશે. ચૂંટણી પંચે કહ્યું હતું કે ડુપ્લિકેટ નંબર હોવાનો અર્થ નકલી મતદાર નથી. આધારને EPIC સાથે લિંક કરવા પાછળનો મુખ્ય ઉદ્દેશ્ય મતદાર યાદીમાં રહેલી ગેરરીતિઓને દૂર કરવાનો અને તેને સ્વચ્છ બનાવવાનો છે. ચૂંટણી પંચનું માનવું છે કે આ પગલું નકલી મતદારોને ઓળખવામાં મદદ કરશે.

આધારને મતદાર ID સાથે લિંક કરવા પાછળનું બીજું કારણ એ છે કે તે નકલી મતદાનને રોકવામાં મદદ કરી શકે છે. આ સિસ્ટમ લાગુ થયા પછી, એક વ્યક્તિએ એકથી વધુ સ્થળોએ મતદાન કરવાની શક્યતા ખતમ થઈ જશે અને ચૂંટણી પ્રક્રિયા વધુ પારદર્શક બનશે.