સંસદની સુરક્ષામાં ચૂકને લઈને લોકસભામાં ભારે હંગામો, ડેરેક ઓ બ્રાયન બાદ હવે લોકસભાના 15 કોંગી સાંસદ સસ્પેન્ડ

સંસદનું શિયાળુ સત્ર ચાલુ છે. આજે કોંગ્રેસના 15 સાંસદો સામે કાર્યવાહી કરવામાં આવી હતી. તેમને લોકસભામાંથી સસ્પેન્ડ કરવામાં આવ્યા છે. તેઓ સત્રના બાકીના ભાગમાં ભાગ લઈ શકશે નહીં. આ સાંસદોને ખુરશી પ્રત્યે અનાદર બદલ સસ્પેન્ડ કરવામાં આવ્યા હતા. આ પહેલા આજે તૃણમૂલ કોંગ્રેસના સાંસદ ડેરેક ઓ બ્રાયનને રાજ્યસભામાંથી સસ્પેન્ડ કરવામાં આવ્યા હતા.

તમને જણાવી દઈએ કે સંસદની સુરક્ષામાં ક્ષતિનો મુદ્દો ગુરુવારે સંસદના બંને ગૃહોમાં ઉઠાવવામાં આવ્યો હતો. વિપક્ષી સાંસદોએ હોબાળો મચાવ્યો હતો. વિપક્ષના સભ્યોએ કેન્દ્રીય ગૃહમંત્રી અમિત શાહના રાજીનામાની માંગ કરી હતી. હોબાળા વચ્ચે, વિપક્ષી સાંસદોએ તેમનો વિરોધ ચાલુ રાખતા લોકસભાને બપોરે 3 વાગ્યા સુધી સ્થગિત કરી દેવામાં આવી હતી. આ પહેલા TMC સાંસદ ડેરેક ઓ બ્રાયનને રાજ્યસભામાંથી સસ્પેન્ડ કરવામાં આવ્યા હતા.

કોંગ્રેસના જે સાંસદોને લોકસભામાંથી સસ્પેન્ડ કરવામાં આવ્યા છે તેમાં ટીએન પ્રથાપન, હિબી એડન, એસ જોતિમણી, રામ્યા હરિદાસ અને ડીન કુરિયાકોસનો સમાવેશ થાય છે. આ સાંસદોને સસ્પેન્ડ કરવાનો પ્રસ્તાવ સંસદીય બાબતોના પ્રધાન પ્રહલાદ જોશી દ્વારા લાવવામાં આવ્યો હતો, જેને સ્પીકરની ખુરશી પર બેઠેલા ભર્તૃહરિ મહતાબ દ્વારા પસાર કરવામાં આવ્યો હતો. આ સાંસદોને શિયાળુ સત્રના બાકીના દિવસો માટે સસ્પેન્ડ કરવામાં આવ્યા છે. આ દરમિયાન વિપક્ષના સાંસદો સતત સરકાર વિરુદ્ધ સૂત્રોચ્ચાર કરતા જોવા મળ્યા હતા.આ સિવાય તૃણમૂલ કોંગ્રેસના રાજ્યસભા સાંસદ ડેરેક ઓ બ્રાયનને સત્રના બાકીના દિવસો માટે સસ્પેન્ડ કરવામાં આવ્યા છે. આ મામલે TMCએ કહ્યું કે જવાબદારી ટાળવી એ ભાજપની સૌથી મજબૂત બાજુ છે.