હૈદરાબાદ સામે પરાજય સાથે મુંબઇ IPLમાંથી ફેંકાયું

અભિષેક શર્મા, ટ્રેવિસ હેડની વિસ્ફોટક બેટિંગ સાથે હૈદરાબાદે માત્ર 9.4 ઓવરમાં ટાર્ગેટ હાંસિલ કર્યો

આઈપીએલ 2024ના 57માં મુકાબલામાં સનરાઇઝર્સ હૈદરાબાદે લખનઉ સુપર જાયન્ટ્સને 10 વિકેટે હરાવ્યું હતું.. ટોસ જીતીને પ્રથમ બેટિંગ કરીને લખનઉએ 20 ઓવરમાં 4 વિકેટ ગુમાવીને 165 રન બનાવ્યા હતા. હૈદરાબાદની ટીમે 166 રનનો ટાર્ગેટ માત્ર 9.4 ઓવરમાં હાંસલ કર્યો હતો. હૈદરાબાદે 62 બોલ બાકી રહેતા મેચ જીતી લીધી હતી.

ટ્રેવિસ હેડે 30 બોલમાં આઠ ચોગ્ગા અને આઠ છગ્ગાની મદદથી 89 રન અને અભિષેક શર્માએ 28 બોલમાં આઠ ચોગ્ગા અને છ છગ્ગાની મદદથી 75 રનની અણનમ ઈનિંગ રમી હતી. અભિષેકે મેચનો અંત સિક્સર સાથે કર્યો હતો.

આ જીત સાથે હૈદરાબાદની ટીમ પોઈન્ટ ટેબલમાં ત્રીજા સ્થાને આવી ગઈ છે. સાત જીત અને પાંચ હાર સાથે 12 મેચ બાદ તેમના 14 પોઈન્ટ છે. હૈદરાબાદનો નેટ રન રેટ +0.406 છે. તે જ સમયે, 12મી મેચમાં લખનઉની આ છઠ્ઠી હાર હતી. ટીમ 12 પોઈન્ટ અને -0.769ના નેટ રન રેટ સાથે છઠ્ઠા સ્થાને છે. હૈદરાબાદની આગામી મેચ 16 મેના રોજ ગુજરાત ટાઇટન્સ અને 19 મેના રોજ પંજાબ કિંગ્સ સામે છે. હૈદરાબાદની ટીમ આ બંને મેચ તેના હોમ ગ્રાઉન્ડ પર રમશે. તે જ સમયે, લખનઉની ટીમે 14 મેના રોજ અરુણ જેટલી સ્ટેડિયમમાં દિલ્હી અને 17 મેના રોજ વાનખેડેમાં મુંબઈનો સામનો કરવાનો છે.

હૈદરાબાદની ટીમ IPL100+ રનના ટાર્ગેટનો પીછો કરતી વખતે સૌથી વધુ બોલ બાકી રહેતા જીતના મામલે ટોપ પર પહોંચી ગઈ છે. 62 બોલ બાકી રાખીને 100+ રનનો પીછો કરવોએ IPLસૌથી મોટી જીત છે. આ પહેલા આ રેકોર્ડ દિલ્હી કેપિટલ્સના નામે હતો. 2022માં 116 રનના સ્કોરનો પીછો કરતા, તેઓએ પંજાબ કિંગ્સ સામે 57 બોલ બાકી રહેતા જીત મેળવી હતી.

આ સાથે જ હૈદરાબાદે ઈંઙક મેચમાં પ્રથમ 10 ઓવરમાં સૌથી વધુ રન બનાવવાનો પોતાનો જ રેકોર્ડ તોડી નાખ્યો છે. આ મેચ પહેલા સનરાઇઝર્સે આ સિઝનમાં દિલ્હી સામે પ્રથમ 10 ઓવરમાં ચાર વિકેટ ગુમાવીને 158 રન બનાવ્યા હતા.

સનરાઈઝર્સ હૈદરાબાદના ઓપનિંગ બેટ્સમેન ટ્રેવિસ હેડ અને અભિષેક શર્મા સામે 166 રનનો ટાર્ગેટ હતો. તેણે માત્ર 58 બોલ રમીને 167 રન બનાવ્યા છે. એક તરફ હેડે પોતાની ઇનિંગમાં 8 ફોર અને 8 સિક્સર ફટકારી હતી. અભિષેકે પણ 8 ચોગ્ગા અને 6 છગ્ગા ફટકારીને તબાહી મચાવી હતી. આ હકીકત આશ્ચર્યજનક છે કે એસઆરએચના બેટ્સમેનોએ બનાવેલા 167 રનમાંથી 148 ચોગ્ગા અને છગ્ગાના પરિણામે છે. હેડ અને અભિષેકે માત્ર 19 રન બનાવ્યા છે.

હૈદરાબાદની આ જીતનો અર્થ એ છે કે હાર્દિક પંડ્યાની આગેવાની હેઠળની મુંબઈ ઈન્ડિયન્સ આઈપીએલ 2024માં પ્લેઓફની રેસમાંથી બહાર થઈ ગઈ છે. આ સિઝનમાં મુંબઈ ઈન્ડિયન્સ પ્લેઓફની રેસમાંથી બહાર થનારી પ્રથમ ટીમ બની ગઈ છે. તેના 12 મેચમાં આઠ પોઈન્ટ છે. એક ટીમ મહત્તમ 12 પોઈન્ટ સુધી પહોંચી શકે છે. હાલ પોઈન્ટ ટેબલમાં કોલકાતા અને રાજસ્થાનના 16-16 પોઈન્ટ છે. તે જ સમયે, હૈદરાબાદના 12 મેચમાં 14 પોઈન્ટ છે, જ્યારે ચેન્નાઈ-દિલ્હી અને લખનૌના 12-12 પોઈન્ટ છે. ચેન્નાઈએ 11 મેચ રમી છે જ્યારે દિલ્હી-લખનૌ વચ્ચે 12-12 મેચ રમાઈ છે. મુંબઈનો નેટ રન રેટ પણ ઘણો ઓછો છે. પ્લેઓફમાં પહોંચવા માટે 12 પોઈન્ટ પૂરતા નથી.

ટ્રેવિસ હેડની રેકોર્ડની વણજાર
ટ્રેવિસ હેડની આઈપીએલ કારકિર્દીની આ પાંચમી અડધી સદી હતી. તેણે આ સિઝનમાં આવી ત્રણ અડધી સદી ફટકારી છે, જે 20 બોલમાં આવી છે. આ સાથે તેણે જેક ફ્રેઝર મેકગર્કના રેકોર્ડની બરાબરી કરી. મેકગર્કની સાથે તેણે IPLમાં ત્રણ વખત 20 બોલમાં અડધી સદી ફટકારવાનો રેકોર્ડ બનાવ્યો છે. આટલું જ નહીં, હેડ IPLમાં પાવરપ્લેમાં સૌથી વધુ અડધી સદી ફટકારવાના મામલે પણ બીજા નંબર પર આવી ગયો છે. તેણે પાવરપ્લેમાં ચાર વખત અડધી સદી ફટકારી છે. આ સિઝનમાં ચારેય અડધી સદી આવી છે. તે જ સમયે, ડેવિડ વોર્નર આ યાદીમાં ટોચ પર છે. તેણે પાવરપ્લેમાં સૌથી વધુ છ વખત અડધી સદી ફટકારી છે.