ભુજમાં ધોમધખતા તડકામાં એક માસનું બાળક ત્યજાયેલી હાલતમાં મળ્યું

માં તે માં, બીજા બધા વગડાના વા આ કહેવત જે મમતા અને માતૃત્વના પવિત્રતાને ઉજાગર કરે છે, તે આજના કળયુગમાં ક્યારેક ખોટી સાબિત થતી હોય તેવા દૃશ્યો સામે આવ્યાં છે. કચ્છના વડામથક ભુજમાં એક એવી હૃદયદ્રાવક ઘટના સામે આવી છે, જે માત્ર માતૃત્વને શરમાવે છે, ધધકતા તાપમાં રડતું ફૂલ જેવું શિશુ ભુજ શહેરના રેલવે સ્ટેશન નજીક દાદુ પીર માર્ગે, મંગળવારના સવારે 11.30 વાગ્યે, એક સવા માસનું ફૂલ જેવું કોમળ શિશુ ઝાડ નીચે રડતું જોવા મળ્યું હતું.

આ ધધકતા ઉનાળાના તાપમાં, જ્યાં વયસ્કો માટે પણ બહાર નીકળવું અસહ્ય બની ગયું છે, ત્યાં આ નાનકડું શિશુ એકલું પડેલું હતું. તેના રડવાના અવાજે સ્થાનિક લોકોનું ધ્યાન ખેંચાયું, અને લોકો ત્યાં એકઠા થઈ ગયા હતા. પોલીસની તાત્કાલિક કાર્યવાહી ઘટનાની જાણ થતાં જ ભુજ બી ડિવિઝન પોલીસના જમાદાર અરવિંદ વણકર તાત્કાલિક ઘટનાસ્થળે દોડી ગયા હતા. તેમણે બાળકનો કબ્જો લીધો અને સ્થાનિક મહિલાઓના સહયોગથી તેને જીકે જનરલ સરકારી હોસ્પિટલમાં ખસેડ્યું હતું. હાલ બાળકની તબિયત સ્થિર હોવાનું જાણવા મળ્યું છે, અને તે સારવાર હેઠળ છે. માતૃત્વ પર પ્રશ્નચિહ્ન આ ઘટના માત્ર એક બાળકના ત્યાગની નથી, પરંતુ તે માતૃત્વના પવિત્ર સંબંધ પર પણ પ્રશ્નચિહ્ન ઊભું કરે છે. કચ્છમાં આંગણું દઝાડતી ગરમીમાં, જ્યાં વયસ્કો માટે પણ બહાર નીકળવું મુશ્કેલ છે, ત્યાં એક માતાએ પોતાના નવજાત બાળકને આમ રસ્તે રઝડતું મૂકી દીધું.

શું તે મજબૂરી હતી? શું તે કોઈ આર્થિક તકલીફ હતી? કે પછી કોઈ સામાજિક દબાણ? આ પ્રશ્નો લોકોના મનમાં ઉઠી રહ્યા છે. માનવતાને ઝંઝોળતી ઘટના આ નાનકડું શિશુ, જે હજુ દુનિયાની કઠોરતાને સમજવા માટે પણ નાનું છે, તે આ રીતે બિનવારસી હાલતમાં મળવું માનવતાને ઝંઝોળી નાખે છે. માતા, જે પોતાના બાળક માટે દુનિયાની દરેક મુશ્કેલીનો સામનો કરવા તૈયાર હોય છે, તે માતાએ આ પગલું શા માટે ભર્યું હશે? આ પ્રશ્ને સમગ્ર ભુજ શહેરમાં ચિંતા અને ચર્ચાનો માહોલ સર્જ્યો છે.