બલુચિસ્તાન લિબરેશન આર્મીને આતંકી સંગઠન જાહેર કરતું યુએસએ

પાક. સેનાને ભારે ચોટ પહોંચાડનારા સંગઠન સામે કાર્યવાહી

અમેરિકાએ બલુચિસ્તાન લિબરેશન આર્મી (BLA) અને તેના ઉપનામ, માજીદ બ્રિગેડને વિદેશી આતંકવાદી સંગઠન (FTO) જાહેર કર્યું છે. યુએસ સ્ટેટ ડિપાર્ટમેન્ટે સોમવારે આ માહિતી આપી હતી. યુએસ સ્ટેટ ડિપાર્ટમેન્ટે કહ્યું છે કે તે BLA ના સ્પેશિયલી ડેઝિગ્નેટેડ ગ્લોબલ ટેરરિસ્ટ (SDGT) લેજિસ્ટ્રેશનમાં માજીદ બ્રિગેડને ઉપનામ તરીકે ઉમેરી રહ્યું છે. બલુચિસ્તાન લિબરેશન આર્મી પાકિસ્તાનના બલુચિસ્તાન ક્ષેત્રમાં સક્રિય છે. તે ઘણીવાર પાકિસ્તાની સેનાને ભારે નુકસાન પહોંચાડે છે.

યુએસ સ્ટેટ ડિપાર્ટમેન્ટે તેની નોટિસમાં કહ્યું છે કે વર્ષ 2019માં અનેક આતંકવાદી હુમલાઓ બાદ બલુચિસ્તાન લિબરેશન આર્મીને ખાસ નિયુક્ત વૈશ્વિક આતંકવાદી જાહેર કરવામાં આવી હતી. 2019 થી, BLA એ અનેક હુમલાઓની જવાબદારી સ્વીકારી છે. તેમાં માજીદ બ્રિગેડ દ્વારા કરવામાં આવેલા હુમલાઓનો સમાવેશ થાય છે. BLA એ 2024 માં કરાચી એરપોર્ટ અને ગ્વાદર પોર્ટ ઓથોરિટી કોમ્પ્લેક્સ નજીક આત્મઘાતી હુમલાઓ કર્યા હોવાનો દાવો કર્યો હતો. BLA એ 2025 માં ક્વેટાથી પેશાવર જતી જાફર એક્સપ્રેસ ટ્રેનના હાઇજેકની જવાબદારી સ્વીકારી હતી, જેમાં 31 નાગરિકો અને સુરક્ષા કર્મચારીઓ માર્યા ગયા હતા અને 300 થી વધુ ટ્રેન મુસાફરોને બંધક બનાવવામાં આવ્યા હતા.