યૌન શોષણ, માનવ તસ્કરીમાં સામેલ જેફરી એપ્સ્ટેઇન ફાઇલોમાં ટ્રમ્પનું નામ: મસ્કનો ધડાકો

અમેરિકાના રાષ્ટ્રપતિ ડોનાલ્ડ ટ્રમ્પ અને ટેક અબજોપતિ એલોન મસ્ક વચ્ચેનો વિવાદ અટકવાનું નામ લેતો નથી. શબ્દયુદ્ધની સ્થિતિ એવી છે કે ટ્રમ્પને ચૂંટણી જીત અપાવવાનો દાવો કર્યા પછી, ટેસ્લા અને સ્પેસએક્સના સીઈઓ એલોન મસ્કે હવે સોશિયલ મીડિયા પર એક સનસનાટીભર્યો ખુલાસો કર્યો છે. મસ્કે દાવો કર્યો હતો કે ટ્રમ્પનું નામ જેફરી એપ્સ્ટેઇન ફાઇલોમાં હતું.

મસ્કે એકસ પર લખ્યું કે હવે ખરેખર બોમ્બ ફેંકવાનો સમય આવી ગયો છે. એપ્સટિન ફાઇલોમાં ડોનાલ્ડ ટ્રમ્પનું નામ છે. એટલા માટે આ ફાઇલો ક્યારેય જાહેર કરવામાં આવી ન હતી. આ પછી તેમણે કટાક્ષમાં લખ્યું, ડોનાલ્ડ ટ્રમ્પ, તમારો દિવસ શુભ રહે.

એલોન મસ્ક પર વળતો પ્રહાર કરતા ટ્રમ્પે કહ્યું કે મને કોઈ ફરક પડતો નથી કે મસ્ક હવે મારી વિરુદ્ધ થઈ ગયા છે. પણ તેમણે આ પહેલા કરી લેવું જોઈતું હતું. તેમણે કહ્યું કે આ કોંગ્રેસ સમક્ષ રજૂ કરાયેલું સૌથી મહત્વપૂર્ણ બિલ હતું. આમાં, 1.6 ટ્રિલિયન ડોલરનો ખર્ચ ઘટાડવામાં આવ્યો છે. આ ઇતિહાસમાં સૌથી મોટો કર ઘટાડો દર્શાવે છે. ટ્રમ્પે કહ્યું કે જો આ બિલ પસાર નહીં થાય તો કર 68 ટકા સુધી વધી શકે છે. રાષ્ટ્રપતિએ કહ્યું કે મેં આ ભૂલ કરી નથી, હું ફક્ત તેને સુધારવા માંગુ છું.

આ બિલ અમેરિકાને વધુ મહાન બનાવશે. આ પોસ્ટ એવા સમયે કરવામાં આવી છે જ્યારે ટ્રમ્પ અને મસ્ક છેલ્લા કેટલાક દિવસોથી ઇલેક્ટ્રિક વાહન નીતિઓ અને ટેક્સ બિલને લઈને ભારે જાહેર ચર્ચા કરી રહ્યા છે. ટ્રમ્પે મસ્ક પર નિશાન સાધ્યું હતું અને કહ્યું હતું કે મસ્ક ટ્રમ્પ વિરોધી ભાવનાથી પીડાઈ રહ્યા છે.
જેફરી એપ્સ્ટેઇન એક અબજોપતિ અને કુખ્યાત ફાઇનાન્સર હતા જેમના પર સગીર છોકરીઓના જાતીય શોષણ અને માનવ તસ્કરી જેવા ગંભીર આરોપોનો સામનો કરવો પડ્યો હતો. તે જ સમયે, 2019 માં એપ્સ્ટેઇનની ધરપકડ પછી, તેમનું શંકાસ્પદ સંજોગોમાં જેલમાં મૃત્યુ થયું. હવે જેફરીની સંપર્ક યાદીને એપ્સટિન ફાઇલ્સ કહેવામાં આવે છે, જે કોર્ટ દ્વારા લાંબા સમયથી સીલ કરવામાં આવી છે.

અમેરિકામાં એપ્સટિનના ક્લાયન્ટ લિસ્ટ એટલે કે તેમના હાઇ-પ્રોફાઇલ ગ્રાહકોની યાદી અંગે ચર્ચા ચાલી રહી છે. આ ફાઇલોમાં ડઝનબંધ પ્રભાવશાળી વ્યક્તિઓના નામ હોવાનું કહેવાય છે, જેમાં રાજકારણીઓ, ઉદ્યોગપતિઓ અને હોલીવુડ સ્ટાર્સનો સમાવેશ થઈ શકે છે.

મસ્ક સાથેના વિવાદ વચ્ચે, 2014નો એક ફોટો સોશિયલ મીડિયા પર વાયરલ થઈ રહ્યો છે, જેમાં મસ્ક અને એપસ્ટેઈનના સહયોગી ઘિસ્લેન મેક્સવેલ સાથે જોવા મળે છે. મસ્કે અગાઉ આ તસવીરને ફોટો બોમ્બ ગણાવી હતી અને કહ્યું હતું કે મેક્સવેલ સાથે તેમનો કોઈ અંગત કે વ્યાવસાયિક સંબંધ નથી. જોકે, 2018 માં, એપ્સટાઇને દાવો કર્યો હતો કે તેમણે મસ્કને કેટલીક સલાહ આપી હતી, જેને મસ્કે નકારી કાઢી હતી.