યુક્રેન યુધ્ધ ન રોકાતાં ટ્રમ્પ ગુસ્સામાં: રશિયા પર નવા પ્રતિબંધોની ધમકી

યુક્રેન પર સતત હુમલો કરી રહેલા રશિયા માટે મુશ્કેલી વધી શકે છે. અમેરિકાના રાષ્ટ્રપતિ ડોનાલ્ડ ટ્રમ્પે રવિવાના રોજ જાહેરાત કરી છે કે તેઓ રશિયા પર પ્રતિબંધોનો બીજો તબક્કો શરૂૂ કરવા માટે તૈયાર છે. ડોનાલ્ડ ટ્રમ્પનું આ નિવેદન સૂચવે છે કે યુક્રેનમાં ચાલી રહેલા યુદ્ધ પર વધતી જતી નારાજગી વચ્ચે તેઓ મોસ્કો અથવા રશિયાથી ક્રૂડ ઓઇલ આયાત કરતા ખરીદદારો પર પ્રતિબંધો વધુ કડક કરવાની ખૂબ નજીક છે.

યુક્રેન પર હુમલો ચાલુ રાખવા બદલ અમેરિકાના રાષ્ટ્રપતિ ડોનાલ્ડ ટ્રમ્પે અગાઉ રશિયા પર વધુ કડક પ્રતિબંધો લાદવાની ધમકી આપી છે. જો કે, આ દરમિયાન વાતચીત ચાલુ રહેવાને કારણે તેમણે આ સમય દરમિયાન કોઈ મોટા પગલાં લીધા નથી. તેમના તાજેતરના નિવેદનથી સ્પષ્ટ થાય છે કે તેઓ હવે રશિયા અને રાષ્ટ્રપતિ વ્લાદિમીર પુતિન સામે વધુ આક્રમક વલણ અપનાવવા તરફ આગળ વધી રહ્યા છે. જો કે, તેમણે હજુ સુધી સ્પષ્ટપણે કહ્યું નથી કે તેઓ આ નિર્ણયને લાગુ કરવા માટે સંપૂર્ણપણે પ્રતિબદ્ધ છે કે પ્રતિબંધોના બીજા તબક્કામાં શું સમાવવામાં આવશે.જ્યારે એક પત્રકારે અમેરિકામાં વ્હાઇટ હાઉસમાં રાષ્ટ્રપતિ ડોનાલ્ડ ટ્રમ્પને પૂછ્યું કે શું તેઓ રશિયા પર પ્રતિબંધોના બીજા તબક્કાને લાગુ કરવા માટે તૈયાર છે.

ત્યારે યુએસ રાષ્ટ્રપતિએ કહ્યું હતું કે, હા, અલબત્ત હું સંપૂર્ણપણે તૈયાર છું.
વાસ્તવમાં અમેરિકાના રાષ્ટ્રપતિ ડોનાલ્ડ ટ્રમ્પ ખૂબ ગુસ્સે છે કે આટલા પ્રયત્નો છતાં તેઓ યુક્રેન અને રશિયા વચ્ચે ત્રણ વર્ષથી વધુ સમયથી ચાલી રહેલા યુદ્ધને રોકવામાં નિષ્ફળ રહ્યા છે, જ્યારે જાન્યુઆરી 2025માં યુએસ પ્રમુખપદ સંભાળતી વખતે તેમણે દાવો કર્યો હતો કે તેઓ રશિયા અને યુક્રેન વચ્ચે ચાલી રહેલા યુદ્ધને શક્ય તેટલી વહેલી તકે સમાપ્ત કરશે.