થાઇલેન્ડની કંબોડિયા પર એર સ્ટ્રાઇક, હુમલામાં 1 સૈનિકનું મોત
થાઈલેન્ડ અને કંબોડિયા વચ્ચે ફરી યુદ્ધ ફાટી નીકળ્યું છે. યુએસ પ્રમુખ ડોનાલ્ડ ટ્રમ્પ દ્વારા મધ્યસ્થી કરાયેલા યુદ્ધવિરામ છતાં, થાઈલેન્ડે ફરી એકવાર કંબોડિયા સરહદ પર હવાઈ હુમલા શરૂૂ કર્યા છે. થાઈ સેનાના પ્રવક્તા મેજર જનરલ વિન્થાઈ સુવારીએ જણાવ્યું હતું કે થાઈલેન્ડે કંબોડિયા સાથેની તેની વિવાદિત સરહદ પર હવાઈ હુમલા કર્યા છે.
થાઈ સેનાએ કંબોડિયા સરહદ પર ઋ-16 તૈનાત કર્યા છે અને કંબોડિયાના પ્રદેશ પર હવાઈ હુમલા કરી રહી છે. થાઈ સેનાએ એક નિવેદનમાં જણાવ્યું હતું કે ઉબોન રત્ચાથાની પ્રાંતના પૂર્વીય ભાગમાં બે સ્થળોએ નવી અથડામણમાં ઓછામાં ઓછો એક થાઈ સૈનિક માર્યો ગયો અને ચાર અન્ય ઘાયલ થયા છે.
જુલાઈમાં આ સરહદ વિવાદ પાંચ દિવસના યુદ્ધમાં પરિણમ્યો, ત્યારબાદ યુએસ પ્રમુખ ડોનાલ્ડ ટ્રમ્પ અને મલેશિયાના વડા પ્રધાન અનવર ઇબ્રાહિમે યુદ્ધવિરામની મધ્યસ્થી કરી. ટ્રમ્પે ઓક્ટોબરમાં કુઆલાલંપુરમાં બંને દેશો વચ્ચે એક મોટા યુદ્ધવિરામ કરાર પર હસ્તાક્ષર જોયા હતા. પરંતુ આ યુદ્ધવિરામ બે મહિના પણ ટકી શક્યો નહીં.
થાઇ સૈન્યના પ્રવક્તા મેજર જનરલ વિન્થાઇએ જણાવ્યું હતું કે સોમવારે વહેલી સવારે ઉબોન રત્ચાથાની પ્રાંતના નામ યુએન જિલ્લાના ચોંગ એન મા વિસ્તારમાં અથડામણો શરૂૂ થઈ હતી. કંબોડિયન સૈનિકોએ સવારે લગભગ 5:05 વાગ્યે નાના હથિયારો અને પરોક્ષ-ફાયર હથિયારોથી ગોળીબાર કર્યો અને ચાલુ રહ્યો.
થાઈ લશ્કરનો દાવો છે કે કંબોડિયાએ સરહદ પર ભારે શસ્ત્રો પહોંચાડ્યા હતા અને લડાયક એકમો તૈનાત કર્યા હતા. થાઈલેન્ડનો દાવો છે કે આ કાર્યવાહી લશ્કરી કામગીરીને વધારી શકે છે અને થાઈ સરહદી પ્રદેશ માટે ખતરો ઉભો કરી શકે છે.
