શાંતિ યોજના પર સહી કરો, નહીં તો જેલમાં જાવ: ટ્રમ્પની ઝેલેન્સ્કીને ધમકી

રશિયા-યુક્રેન શાંતિ સમજૂતીના મુદ્દે અમેરિકન પ્રમુખ ડોનાલ્ડ ટ્રમ્પે યુક્રેનના રાષ્ટ્રપતિ વોલોદિમીર ઝેલેન્સ્કીને અલ્ટીમેટમ આપ્યું છે. ટ્રમ્પે ઝેલેન્સ્કીને સ્પષ્ટપણે જણાવ્યું છે કે, જો તેઓ 27 નવેમ્બર સુધીમાં 28-સૂત્રીય શાંતિ યોજના પર હસ્તાક્ષર નહીં કરે, તો તેમને સત્તા પરથી હટાવી દેવામાં આવશે.

ટ્રમ્પે ઝેલેન્સ્કીને ધમકી પણ આપી છે કે, સત્તા પરથી હટાવ્યા બાદ તેમને તરત જ જેલમાં મોકલાશે. અમેરિકી વિદેશ વિભાગ દ્વારા ઝેલેન્સ્કીને પહોંચાડવામાં આવેલા આ સખત સંદેશમાં ભારપૂર્વક કહેવામાં આવ્યું છે કે, અમે હવે કોઈપણ ભોગે યુદ્ધ રોકવા માગીએ છીએ.

તાજેતરના દિવસોમાં યુક્રેનના રાષ્ટ્રપતિના ઘણા નજીકના લોકો પર ગંભીર ભ્રષ્ટાચારના આરોપો લાગ્યા છે. આ આરોપોમાં સામેલ બે વ્યક્તિઓ ઝેલેન્સ્કી સરકારમાં મંત્રી હતા, જેમને પદ પરથી દૂર કરવામાં આવ્યા છે. આ કેસોને કારણે હાલમાં ઝેલેન્સ્કી દબાણ હેઠળ છે, કેમ કે તેમના પર આ મંત્રીઓને લાંબા સમય સુધી છૂટોદોર આપવાનો આરોપ છે. કેબિનેટના આ બે મંત્રીઓના કૌભાંડોને કારણે ભ્રષ્ટાચારની અસર હવે સીધી ઝેલેન્સ્કી સુધી પણ પહોંચી શકે છે. અમેરિકા આ જ પરિસ્થિતિનો લાભ લેવાનો પ્રયાસ કરી રહ્યું છે.