શેખ હસીના સામે કેસના ચૂકાદા પહેલાં ઢાકામાં શ્રેણીબધ્ધ બોંબ બ્લાસ્ટ
બાંગ્લાદેશના પૂર્વ વડાપ્રધાન સામે ગત વર્ષે માનવતા વિરૂધ્ધ પગલાં લેવાનો આરોપ છે, ચૂકાદા પહેલાં પાટનગરમાં હિંસક પ્રદર્શનો, શૂટ એટ સાઇટનો ઓર્ડર
બાંગ્લાદેશ હિંસાના એક વર્ષ પછી, દેશની રાજધાની ઢાકામાં ફરી એકવાર અરાજકતા ફેલાઈ ગઈ છે. અનેક સ્થળોએ બોમ્બ વિસ્ફોટોથી લોકો ગભરાઈ ગયા છે. ઢાકામાં હિંસક વિરોધ પ્રદર્શનો સતત વધી રહ્યા છે. પરિસ્થિતિ હવે એવી સ્થિતિમાં પહોંચી ગઈ છે જ્યાં પોલીસે હિંસક વિરોધીઓને જોતાં જ ગોળી મારવાના આદેશો જારી કર્યા છે.
અહેવાલ મુજબ, પોલીસે રવિવારે ઢાકામાં અનેક સ્થળોએ બોમ્બ વિસ્ફોટોની પુષ્ટિ કરી છે. ઇન્ટરનેશનલ ક્રિમિનલ ટ્રિબ્યુનલ (ઈંઈઝ) આજે ભૂતપૂર્વ વડા પ્રધાન શેખ હસીના સામેના આરોપો પર પોતાનો ચુકાદો આપવાનું છે. હાલમાં દેશભરમાં હિંસા ફેલાઈ રહી છે. ઢાકા બોમ્બ વિસ્ફોટોમાં કોઈ જાનહાનિના અહેવાલ નથી, પરંતુ શ્રેણીબદ્ધ વિસ્ફોટોએ ઢાકાને હચમચાવી નાખ્યું છે. સમગ્ર બાંગ્લાદેશમાં હાઇ એલર્ટ જારી કરવામાં આવ્યું છે.
કોર્ટના નિર્ણય પહેલાં, શેખ હસીનાએ એક ઓડિયો સંદેશ જાહેર કર્યો હતો જેમાં લોકોને તેમના વિરોધને વધુ તીવ્ર બનાવવા વિનંતી કરવામાં આવી હતી. દરમિયાન, શેખ હસીનાની પાર્ટી, અવામી લીગના સમર્થકોએ સમગ્ર બાંગ્લાદેશમાં સંપૂર્ણ બંધનું એલાન આપ્યું છે. દેશમાં હિંસા ફાટી નીકળવાની આશંકાને કારણે બાંગ્લાદેશ હાઇ એલર્ટ પર છે. ઢાકા મેટ્રોપોલિટન પોલીસ (ઉખઙ) કમિશનર શેખ મોહમ્મદ સજ્જાદ અલીએ હિંસામાં સામેલ લોકોને જોતા જ ગોળી મારવાનો આદેશ આપ્યો છે.
શેખ હસીના સામે શું આરોપ છે? ભૂતપૂર્વ વડા પ્રધાન શેખ હસીના પર ગયા વર્ષની હિંસા દરમિયાન માનવતા વિરુદ્ધ પગલાં લેવાનો આરોપ છે. વડા પ્રધાન તરીકે હિંસાને નિયંત્રિત કરવા માટે વિરોધ કરી રહેલા વિદ્યાર્થીઓ સામે કાર્યવાહી કરવાનો આદેશ આપવાનો તેમના પર આરોપ છે. જોકે, શેખ હસીનાએ આ આરોપોને જોરદાર રીતે નકારી કાઢ્યા છે.
