શિકાગોમાં રેપરની પાર્ટીમાં આડેધડ ગોળીબાર: 4નાં મોત, 14 ઘાયલ

રેસ્ટોરન્ટ બહાર બનેલી ઘટના પછી ગુનેગારો ફરાર

અમેરિકાના શિકાગોમાં એક રેસ્ટોરન્ટની બહાર થયેલા ગોળીબારમાં 4 લોકોના મોત થયા છે અને 14 અન્ય ઘાયલ થયા છે. પોલીસે આ માહિતી આપી છે. ગોળીબાર દરમિયાન ઘાયલ થયેલા લોકોને હોસ્પિટલમાં દાખલ કરવામાં આવ્યા છે, જેમાંથી 3 લોકોની હાલત ગંભીર હોવાનું કહેવાય છે.

આ ઘટના શિકાગોના રિવર નોર્થ વિસ્તારમાં એક રેસ્ટોરન્ટની બહાર બની હતી, જ્યાં એક ગાયકની આલ્બમ રિલીઝ પાર્ટી ચાલી રહી હતી. પોલીસે જણાવ્યું હતું કે એક અજાણ્યા વ્યક્તિએ ભીડ પર ગોળીબાર કર્યો હતો અને પછી વાહનમાં સ્થળ પરથી ભાગી ગયો હતો. હાલમાં કોઈની ધરપકડ કરવામાં આવી નથી.

પોલીસના જણાવ્યા અનુસાર, ગોળીબારમાં 21 થી 32 વર્ષની વયના 13 મહિલાઓ અને 5 પુરુષો ઘાયલ થયા છે. મૃતકોમાં 2 પુરુષો અને 2 મહિલાઓનો સમાવેશ થાય છે.

મીડિયા રિપોર્ટ્સ અનુસાર, છેલ્લા 50 વર્ષમાં અમેરિકામાં શસ્ત્રોના કારણે 15 લાખથી વધુ લોકો મૃત્યુ પામ્યા છે. અમેરિકાની કુલ વસ્તી લગભગ 33 કરોડ છે, જ્યારે દેશમાં શસ્ત્રોની સંખ્યા 40 કરોડથી વધુ છે. અહીં શસ્ત્રો ખરીદવાના નિયમો અનુસાર, રાઇફલ અથવા નાની બંદૂક ખરીદવા માટે વ્યક્તિની ઉંમર ઓછામાં ઓછી 18 વર્ષની હોવી જોઈએ, જ્યારે અન્ય શસ્ત્રો માટે લઘુત્તમ વય મર્યાદા 21 વર્ષ છે.