'પાકિસ્તાન પરમાણુ પરીક્ષણો કરી રહ્યું છે...' રાષ્ટ્રપતિ ડોનાલ્ડ ટ્રમ્પનો મોટો દાવો

અમેરિકાના રાષ્ટ્રપતિ ડોનાલ્ડ ટ્રમ્પે તાજેતરમાં પરમાણુ પરીક્ષણની જાહેરાત કરી હતી. તેમણે કહ્યું હતું કે અમેરિકા તાત્કાલિક પરમાણુ શસ્ત્રોનું પરીક્ષણ ફરી શરૂ કરશે. આ પછી ટ્રમ્પે હવે પાકિસ્તાનના પરમાણુ શસ્ત્રોના પરીક્ષણ અંગે એક મહત્વપૂર્ણ ખુલાસો કર્યો છે.

ટ્રમ્પે ખુલાસો કર્યો હતો કે પાકિસ્તાન પરમાણુ પરીક્ષણો કરી રહ્યું છે. તેમણે રવિવારે CBS ન્યૂઝને આપેલા ઈન્ટરવ્યૂમાં આ નિવેદન આપ્યું હતું. જ્યારે ટ્રમ્પને પૂછવામાં આવ્યું કે નોર્થ કોરિયા સિવાય કોઈ પરમાણુ પરીક્ષણો કરી રહ્યું નથી, તો તમે શા માટે કરી રહ્યા છો? ત્યારે તેમણે જવાબ આપ્યો કે રશિયા, પાકિસ્તાન અને ચીન પણ ગુપ્ત પરીક્ષણો કરી રહ્યા છે, પરંતુ દુનિયાને ખબર પડતી નથી.

ટ્રમ્પે દાવો કર્યો હતો કે અમેરિકા પાસે વિશ્વમાં સૌથી વધુ પરમાણુ શસ્ત્રો છે. "આપણી પાસે વિશ્વને 150 વખત નાશ કરવા માટે પૂરતા પરમાણુ શસ્ત્રો છે," ટ્રમ્પે કહ્યું. તેમણે કહ્યું કે તેમણે રશિયન રાષ્ટ્રપતિ વ્લાદિમીર પુતિન અને ચીનના રાષ્ટ્રપતિ શી જિનપિંગ સાથે પરમાણુ નિઃશસ્ત્રીકરણ અંગે ચર્ચા કરી છે. ટ્રમ્પે જણાવ્યું હતું કે પરીક્ષણ માટેની તૈયારીઓ પહેલાથી જ થઈ ગઈ છે, જોકે તેમણે સમય કે સ્થાનનો ઉલ્લેખ કર્યો નથી. ટ્રમ્પે પહેલાથી જ રક્ષા મંત્રાલય (પેન્ટાગોન)ને તાત્કાલિક પરમાણુ હથિયારોનું પરીક્ષણ શરૂ કરવાનો આદેશ આપ્યો છે.

ટ્રમ્પે દાવો કર્યો છે કે શી જિનપિંગે તેમને ભરોસો આપ્યો હતો કે જ્યાં સુધી ટ્રમ્પ રાષ્ટ્રપતિ છે ત્યાં સુધી ચીન તાઇવાન પર નિયંત્રણ મેળવવા માટે કોઈ લશ્કરી કાર્યવાહી કરશે નહીં.
ટ્રમ્પનો દાવો છે કે તેમના પહેલા કાર્યકાળ દરમિયાન, ચીને ક્યારેય તાઇવાન પર હુમલો કરવાની હિંમત કરી ન હતી કારણ કે તેને અમેરિકાના મજબૂત પ્રતિક્રિયાનો ડર હતો.