અમેરિકાના કેલિફોર્નિયામાં મોટી દુર્ઘટના: ટેક ઓફની 2 મિનિટમાં જ પ્લેન ક્રેશ, 2નાં મોત, 18 ઘાયલ

અમેરિકાના કેલિફોર્નિયામાં પ્લેન ક્રેશ થવાની ઘટના સામે આવી છે. એક પ્લેન બિલ્ડિંગની છત સાથે અથડાયું અને ત્યારબાદ ક્રેશ થયું હતું. આ અકસ્માતમાં 2 લોકોનાં મોત થયા છે અને 18 લોકો ઘાયલ પણ થયા છે. મળતી માહિતી મુજબ આ પ્લેન એક વેરહાઉસ પર પડ્યું હતું. આ પછી પ્લેનમાં આગ લાગી હતી. આ ઘટના ગઈ કાલે બપોરે 2 વાગ્યાની આસપાસ બની હતી. આ નાનું પ્લેન ફુલર્ટન મ્યુનિસિપલ એરપોર્ટ નજીક એક બિલ્ડિંગ પર પડ્યું હતું.

https://x.com/bennyjohnson/status/1874953553032462390

જે જગ્યાએ આ પ્લેન ક્રેશ થયું તે લોસ એન્જલસથી લગભગ 25 માઈલ દક્ષિણપૂર્વમાં હતું અને જે ઈમારતમાં પ્લેન ક્રેશ થયું તે ફર્નીચર મેન્યુફેક્ચરિંગ કંપનીની ઈમારત હતી. પોલીસે જણાવ્યું કે દુર્ઘટના સમયે બિલ્ડિંગની અંદર લોકો હાજર હતા. ફુલર્ટન પોલીસે જણાવ્યું કે આ અકસ્માતમાં બે લોકોના મોત થયા છે જ્યારે 18 લોકો ઘાયલ થયા છે. ઈજાગ્રસ્તોને તાત્કાલિક હોસ્પિટલમાં લઈ જવામાં આવ્યા હતા. જેમાંથી કેટલાકની હાલત ગંભીર હોવાનું કહેવાય છે.

વાસ્તવમાં છેલ્લા કેટલાક દિવસોમાં પ્લેન દુર્ઘટનાના ઘણા સમાચાર સામે આવ્યા છે. તાજેતરમાં, દક્ષિણ કોરિયાના મુઆન ઇન્ટરનેશનલ એરપોર્ટ પર એક પ્લેન દુર્ઘટનાગ્રસ્ત થયું હતું. તેમાં 181 લોકો હતા. બોર્ડમાં બે સિવાયના દરેક જણ મૃત્યુ પામ્યા. આ વિમાન થાઈલેન્ડથી દક્ષિણ કોરિયા જઈ રહ્યું હતું. વિમાન એરપોર્ટ પર ઉતરતાની સાથે જ થોડુ અંતર કાપ્યા બાદ રનવે પર લપસી ગયું અને ડિવાઈડર સાથે અથડાયું. આ પછી પ્લેનમાં આગ લાગી હતી. તે જ સમયે, આ દુર્ઘટનાના થોડા કલાકો પછી, કેનેડામાં વિમાન દુર્ઘટના થઈ. જોકે આ અકસ્માતમાં કોઈનું મોત થયું નથી. વિમાનમાં લગભગ 80 લોકો સવાર હતા.