"ભારત અમારી સાથે છે.." રશિયા સાથેના યુદ્ધ વચ્ચે યુક્રેનિયન રાષ્ટ્રપતિ ઝેલેન્સકીનું મહત્વનું નિવેદન

રશિયા અને યુક્રેન વચ્ચે યુદ્ધ ત્રણ વર્ષથી ચાલી રહ્યું છે. યુએસ પ્રમુખ ડોનાલ્ડ ટ્રમ્પ આ સંઘર્ષને રોકવા માટે પ્રયાસ કરી રહ્યા છે, પરંતુ હજુ સુધી કોઈ ઉકેલ આવ્યો નથી. આ દરમિયાન યુક્રેનિયન પ્રમુખ ઝેલેન્સકીએ ભારત અંગે એક મહત્વપૂર્ણ નિવેદન આપ્યું છે.

યુક્રેનિયન પ્રમુખ વોલોડીમીર ઝેલેન્સકીએ રશિયા સાથેના સંઘર્ષ વચ્ચે કહ્યું કે ભારત મોટાભાગે અમારા પક્ષમાં છે. તેમણે ઉર્જા ક્ષેત્રમાં ભારત સાથેની કેટલીક સમસ્યાઓનો સ્વીકાર કર્યો છે, પરંતુ તેમણે એમ પણ કહ્યું છે કે આ સમસ્યાઓનો ઉકેલ લાવી શકાય છે.

ઝેલેન્સકીએ કહ્યું કે યુરોપે ભારત સાથે મજબૂત સંબંધો બનાવવા જોઈએ. "આપણે ભારતને અવગણી શકીએ નહીં." વધુમાં ઝેલેન્સકીએ અગાઉ સંયુક્ત રાષ્ટ્ર સુરક્ષા પરિષદને કહ્યું હતું કે ચીને રશિયા પર દબાણ કરવું જોઈએ કે તેઓ યુદ્ધ રોકે. તેમણે કહ્યું હતું કે જો ચીન ખરેખર આ યુદ્ધનો અંત ઇચ્છે છે, તો તેણે રશિયા પર દબાણ કરવું જોઈએ. પુતિનનું રશિયા ચીન વિના કંઈ નથી, પરંતુ તે સામાન્ય રીતે મૌન રહે છે.

યુએસ પ્રમુખ ટ્રમ્પે રશિયા-યુક્રેન સંઘર્ષ પર જણાવ્યું હતું કે યુદ્ધ સમાપ્ત થયા પછી અમેરિકા હવે યુક્રેનની સુરક્ષાની ખાતરી આપવા તૈયાર છે. ઝેલેન્સકીએ જવાબ આપતા કહ્યું કે તેઓ આશ્ચર્યચકિત થયા હતા, પરંતુ તેને એક સકારાત્મક સંકેત માન્યું કે ટ્રમ્પ અને યુનાઇટેડ સ્ટેટ્સ યુદ્ધના અંત સુધી યુક્રેન સાથે ઉભા રહેશે.