ભારત પોતાના તમામ વેપાર અવરોધો દુર કરવા તૈયાર છે: ટ્રમ્પનો પુનરોચ્ચાર

અમેરિકાના રાષ્ટ્રપતિ ડોનાલ્ડ ટ્રમ્પે ફરી એકવાર ભારત સાથેના વેપાર સોદા વિશે પોતાનો મુદ્દો પુનરાવર્તિત કર્યો છે. તેમણે કહ્યું કે ભારત સાથે ટૂંક સમયમાં ખૂબ જ મોટો સોદો થવાનો છે. તેઓ તેમના તમામ વેપાર અવરોધોને દૂર કરવા માંગે છે, જે અકલ્પનીય છે. વ્હાઇટ હાઉસ ખાતે એક પત્રકાર પરિષદને સંબોધતા ટ્રમ્પે કહ્યું કે અમેરિકા ભારત સાથે એવો કરાર કરશે, જ્યાં આપણને જઈને વ્યવસાય કરવાનો અધિકાર હશે.

ડોનાલ્ડ ટ્રમ્પનું આ નિવેદન 9 જુલાઈના રોજ ટેરિફ ડેડલાઇન પૂરી થાય તે પહેલાં આવ્યું છે. ટ્રમ્પે કહ્યું કે ઘણા દેશો સાથે સોદા થઈ રહ્યા છે, જેમાંથી એક મોટો સોદો ભારત સાથે થવાનો છે. તેમણે કહ્યું કે અમે ભારત સાથે એવો કરાર કરવા જઈ રહ્યા છીએ, જ્યાં આપણને ત્યાં જઈને વ્યવસાય કરવાનો અધિકાર હશે. અત્યારે તેના પર પ્રતિબંધ છે. તમે ત્યાં જઈ શકો છો અને તમે તેના વિશે વિચારી પણ શકતા નથી.

ટ્રમ્પે વધુમાં કહ્યું કે અમે વેપાર અવરોધોને સંપૂર્ણપણે દૂર કરવા માંગીએ છીએ, જે અકલ્પનીય છે. મને ખાતરી નથી કે આવું ભારત સાથે થશે. પરંતુ આ સમયે અમે ભારત જઈને વેપાર કરવા સંમત થયા છીએ. ટ્રમ્પે કહ્યું કે તેઓ આગામી દોઢ અઠવાડિયામાં એક પત્ર મોકલીને દેશોને જણાવશે કે તેઓએ અમેરિકાને કેટલો ટેરિફ દર ચૂકવવો પડશે.