કેલીફોર્નિયામાં ગુજરાતી જવેલર્સમાંથી કરોડોના સોના-દાગીનાની દીલધડક લૂંટ

ફિલ્મી ઢબે શો-રૂમમાં ગાડી ઘુસાડી દીધી, હથોડાથી શો-કેસ તોડીને બુકાનીધારીઓએ આખો શો-રૂમ સાફ કરી નાખ્યો

કેલિફોર્નિયાના સનીવેલમાં રવિવારે (29 જૂન) બપોરના સમયે એક ગુજરાતી જ્વેલર્સને ત્યાં લૂંટ કરવામાં આવી હતી. લૂંટારાઓ ફિલ્મી ઢબે આવ્યા અને ગાડી સીધી જ દુકાનની અંદર ઘુસાડી દીધી. માત્ર 90 સેક્ધડમાં તો લાખોના દાગીના લૂંટીને ફરાર પણ થઈ ગયા. ધોળા દિવસે આ થયેલી લૂંટના કારણે સ્થાનિકો અને દુકાનદારોમાં ભયનો માહોલ જોવા મળી રહ્યો છે.

મળતી માહિતી મુજબ, રવિવારે (29 જૂન) લગભગ બપોરે 2:45 (ત્યાંનો સમય) વાગ્યે ઇસ્ટ અલ કેમિનો રીઅલ પર આવેલી ગુજરાતી માલિકની મનીષા જ્વેલર્સ નામની દુકાનને લૂંટારાઓએ નિશાનો બનાવી હતી. આ સમગ્ર ઘટના સીસીટીવીમાં કેદ થઈ હતી. આ ફૂટેજમાં જોવા મળ્યું કે, લૂંટારાઓ ગાડીમાં આવે છે અને ગાડી સીધી દુકાનની અંદર ઘુસાડી દે છે. વાહન અંદર ઘુસ્યા બાદ આ લૂંટારાઓ દુકાનની અંદર આવી જાય છે અને હથોડી વડે શોકેસ તોડી નાંખે છે અને ત્યાં પડેલા તમામ દાગીના લઈને નસી જાય છે. ફક્ત 90 સેક્ધડની અંદર લૂંટારૂૂઓએ આ લૂંટને અંજામ આપ્યો હતો.

લૂંટારાઓ જે ગાડી લઈને આવ્યા હતા તે પણ ચોરીની હતી અને આ ગાડી તેઓ ત્યાં જ મૂકીને ફરાર થઈ ગયા હતા. આ ઘટના દરમિયાન દુકાનની અંદર હાજર માલિકને ઈજા પહોંચી હતી. દુકાનદાર ડેસ્ક પર બેઠો હતો ત્યારે ગાડી દુકાનના આગળના ભાગમાં અથડાઈ હતી, આ દરમિયાન તેમને ઈજા પહોંચી હતી. હાલ તેઓ હોસ્પિટલમાં સારવાર હેઠળ છે.